DXX xodimlari tomonidan Iqtisodiy jinoyatlarga qarshi kurashish departamenti bilan hamkorlikda o‘tkazilgan tezkor tadbirda Farg‘ona, Namangan va Andijon viloyatlarida korrupsiya bilan bog‘liq holatlar aniqlandi.
“Farg‘ona suv ta’minoti” AJ Qo‘qon shahar bo‘limining muqaddam sudlangan ikki nafar inspektori o‘z xizmat vazifalaridan foydalanib, Qo‘qon shahrida mahalliy qurilish firmasi barpo etayotgan yangi ko‘p qavatli uylardagi jami 555 ta xonadonga ichimlik suvi uchun hisoblagich o‘rnatish, shaxsiy kartochka ochish, sertifikat qilib berish va boshqa xizmatlar evaziga 51 ming dollar olgan vaqtlarida ashyoviy dalillar bilan ushlangan.
Hozirda mazkur shaxslarga nisbatan Jinoyat kodeksining 25,168-moddasining (firibgarlik) 4-qismi “a” bandi va 28,211-moddasining (pora berish) 3-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
Namangan viloyatida kuzatilgan holatda “Hududiy elektr tarmoqlari” AJga qarashli “Energosavdo” korxonasining Davlatobod tuman bo‘limi muhandisi metall eritish faoliyati bilan shug‘ullanuvchi MCHJda elektr hisoblagichdan noqonuniy foydalanilgani sababli, davlatga juda ko‘p miqdorda zarar yetkazilganini ro‘kach qilib, holatni rasmiylashtirmaslik va jarimaga tortmaslik evaziga vositachi orqali 20 ming dollar olgan vaqtida ushlangan.
Hozirda mazkur shaxsga nisbatan Jinoyat kodeksining 168-moddasi 4-qismi “a” bandi va 28,211-moddasining 3-qismi “a” bandi bilan jinoyat ishi qo‘zg‘atilib, qamoq ehtiyot chorasi qo‘llanildi.
Andijon viloyatidagi tumanlardan birining kadastr bo‘limi boshlig‘i fuqaroga bog‘dorchilik yo‘nalishida foydalanish uchun hokimiyat tomonidan ijaraga berilgan 1 gektar yerning 17 sotix qismidagi noqonuniy qurilmani buzish bo‘yicha dalolatnoma rasmiylashtirmaslik, sudlarga da’vo arizasi kiritmaslik va uni jinoiy javobgarlikka tortish yuzasidan prokuratura organlariga hujjatlar taqdim qilmaslik, shuningdek, keyinchalik ushbu yer maydonining 22 sotix qismini “O‘zboshimchalik bilan egallab olingan yer uchastkalariga hamda ularda qurilgan binolar va inshootlarga bo‘lgan huquqlarni e’tirof etish to‘g‘risida”gi qonun asosida turar-joy sifatida rasmiylashtirilishida yordam berish evaziga 6 ming dollar talab qilgan.
U so‘ralgan pul mablag‘ini o‘zining xizmat xonasida olgan vaqtida ashyoviy dalillar bilan ushlangan.
Hozirda mazkur mansabdor shaxsga nisbatan Jinoyat kodeksining 210-moddasi (pora olish) 1-qismi bilan jinoyat ishi qo‘zg‘atilib, qamoq ehtiyot chorasi qo‘llanildi.
So‘nggi oylarda e’lon qilingan firibgarlik va korrupsiya holatlari
Mart oyida Toshkent shahri va viloyatida fuqarolarni ishga kiritib qo‘yish uchun pul olgan Milliy gvardiya xodimlari qamoqqa olindi. Fevralda Toshkent shahrining Yashnobod, Navoiy shahri hamda Farg‘ona viloyatining Oltiariq tumanlarida fuqarolarga imtiyozli kredit olib berishni vaʼda qilgan shaxslar ushlandi. Xorazmda transport boshqarmasi bosh mutaxassisi 80 ming dollar olayotganida qo‘lga tushdi. Yanvarda Toshkentning Uchtepa tumanida hokim yordamchisi 30 ming dollari olayotganiga ushlandi.
Izoh (0)