“O‘zbekiston Respublikasining Maʼmuriy javobgarlik to‘g‘risidagi kodeksiga o‘zgartirish va qo‘shimchalar kiritish to‘g‘risida”gi qonun loyihasi jamoatchilik muhokamasiga qo‘yildi.
Unga ko‘ra, MJtK kelgusida “126-1(prim1)-modda bilan to‘ldirilishi va haydovchilar oynalar tusini o‘zgartirish (qoraytirish) uchun tegishli ruxsatnomada ko‘rsatilgan talablarni buzib, transport vositalaridan foydalanganligi uchun BHMning 1 baravari miqdorida (375 ming so‘m) jarimaga tortilishlari mumkin.
Qonun loyihasi muhokamasi 11-aprelga qadar davom etadi.
Strategik islohotlar agentligi O‘zbekistonda avtomobil oynalarini ruxsatnomasiz qoraytirganlik uchun belgilangan jarima miqdorini kamaytirishni taklif qilgandi.
Maʼlumot uchun, bugungi kunda respublikada “tonirovka” uchun ruxsatnoma bir yil muddatga beriladi. “Maʼmuriy javobgarlik to‘g‘risidagi kodeks”ining 126-moddasiga ko‘ra, texnik reglamentga muvofiq bo‘lmagan ko‘zgusimon va tusi o‘zgartirilgan (qoraytirilgan) oynali transport vositalaridan, xuddi shuningdek, haydovchining o‘rnidan tevarak-atrofni ko‘rishni cheklaydigan qo‘shimcha narsalar o‘rnatilgan yoki qoplamalar surtilgan transport vositalaridan foydalanish (bundan oynalar tusini o‘zgartirish (qoraytirish) uchun tegishli ruxsatnoma berilgan transport vositalari mustasno) BHMning 25 baravari (9 mln 375 ming so‘m) miqdorida jarima solishga sabab bo‘ladi.
Xuddi shunday huquqbuzarlik maʼmuriy jazo chorasi qo‘llanilganidan keyin bir yil davomida takror sodir etilgan bo‘lsa, BHMning qirq baravari miqdorida (15 mln so‘m) jarima solishga sabab bo‘ladi.
Izoh (0)