BBC nashri so‘nggi kunlarda O‘zbekistonda yuz berayotgan hodisalarga e’tibor qaratdi.
Nashr karantin qaytishi xavotirlariga munosabat, gaz va elektr tariflari oshmasligi, Surxondaryoda neandertal odam makoni topilgani, tonirovka qisman bepul bo‘lgani haqida yozgan.
BBC maqolasi quyidagicha:
Yana karantin masalasi
Sanepidem xizmati boshlig‘i o‘rinbosari Nurmat Otabekov kasallanishlar ortishi fonida yana karantin choralari kuchaytirilishiga oid yuzaga kelgan xavotirlarga munosabat bildirgan.
Otabekov hozirda mamlakatda, asosan, koronavirusning omikron shtammi aniqlanayotgani, bemorlarning 98 foizida esa kasallik yengil kechayotgani haqida gapirgan.
“Asl vaziyatga qaraydigan bo‘lsak, bir kunda mamlakatimizda o‘rtacha 100-120 ta kasallanish qayd etilmoqda. Albatta, 35 million aholi orasida bu — juda kichik ko‘rsatkich”, degan mas’ul.
Shunga qaramay, Otabekov aholini vaksina olishga chaqirgan.
Bir vaqtning o‘zida SSV kunlik kasallanishlar soni ortayotgani va shu sababdan Toshkent shahrining 12 ta tumanida kovid-poliklinikalar faoliyati qayta tiklanayotganini xabar qilgan.
Gaz va svet narxi oshmaydi
1-iyulda elektr va gaz iste’moli uchun to‘lov miqdori oshirilmaydi.
Energetika vazirligi mazkur masala hozirda ishchi guruh tomonidan o‘rganilayotganini ma’lum qilgan.
Bundan avval elektr va gaz to‘lovlarini narxini ijtimoiy norma asosida oshirish to‘g‘risidagi Vazirlar Mahkamasi qarori loyihasi e’lon qilingan edi.
Loyihada narxlarni 1-iyuldan oshirish ko‘zda tutilgandi.
Biroq Energetika vazirligi qaror loyihasi bo‘yicha fuqarolardan mingdan ortiq murojaat kelib tushganini xabar qilgan.
“Qabul qilingan takliflar bo‘yicha barcha xulosalar va mutaxassislarning xulosalari taqdim etilgandan so‘ng, ushbu masala bo‘yicha yakuniy va tegishli qaror qabul qilinadi”, deyiladi vazirlik xabarida.
Surxondaryoda topilgan neandertal
Sherobod tumanidagi Xatak g‘orida yana bir neandertal odam makoni aniqlangan.
Turizm va madaniy meros vazirligi g‘orda tosh qurollar, yovvoyi hayvonlarning maydalangan suyaklari bilan birga miloddan avvalgi 100-40 ming yillikka oid neandertal odami hayotining to‘liq va buzilmagan manzarasi saqlanib qolganligi aniqlanganini xabar qilgan.
Ayni g‘orda 2021-yilda arxeologlar neandertal odam makonini topgan edi.
Vazirlik hozirda mutaxassislar tomonidan qazishma ishlari davom etayotganini qo‘shimcha qilgan.
“Hizb ut-Tahrir” a’zolari ushlandimi?
Samarqandda “Hizb ut-Tahrir” tashkilotiga a’zolikda gumonlangan to‘rt nafar shaxs qo‘lga olingan.
Viloyat IIB guruhning ikki tashkilotchisi “Hizb ut-Tahrir”ning “Islom nizomi” nomli kitobi va “Al-Va’y” jurnalidan foydalangan holda boshqalarga dars o‘tib, mamlakatda “konstitutsion tuzumni ag‘darib tashlab, Xalifalik davlatini tiklashga targ‘ib qilib kelgani”ni ma’lum qilgan.
Shuningdek, ular ota-onalari, yaqinlari va ko‘plab tanishlarini o‘z saflariga a’zo bo‘lishga da’vat qilib, internet orqali ekstremistik mazmundagi audio va video materiallarni tarqatishgan, deyiladi rasmiy xabarda.
Samarqand viloyat IIB mazkur guruh ayni vaqt Polshada bo‘lgan 42 yashar Qirg‘iziston fuqarosi tomonidan boshqarib kelingan, deya qo‘shimcha qilgan.
Arzonlashtirilgan tonirovka
O‘zbekistonda avtomashinalar oynalarini qoraytirish arzonlashtirilib, qisman bepul bo‘lgan.
Prezident qarori bilan 1-iyuldan boshlab yengil avtomashinalar orqa yon oynalarini tonirovka qildirish uchun pullik ruxsatnoma olish tartibi bekor qilingan.
Mashinaning old yon oynalarini qoraytirish uchun pulliligicha qolib, narxi BHMning sakkiz barobari miqdorida — 2,4 million so‘m etib belgilangan.
Shuningdek, yengil avtomobillarni majburiy texnik ko‘rikdan o‘tkazish muddatlari bo‘yicha ham yengillik berilgan.
Xususan, ishlab chiqarilganiga 11 yildan 14 yilgacha bo‘lgan mashinalarni ikki yilda bir marta, ishlab chiqarilganiga 15 yil va undan ortiq bo‘lganlarni esa bir yilda bir marta majburiy texnik ko‘rikdan o‘tkazish tartibi belgilanmoqda.
Izoh (0)