Toshkent viloyati Chinoz tumanida yashovchi fuqaro noqonuniy ravishda fuqarolarga tonirovka uchun ruxsatnoma tayyorlash bilan shug‘ullanib kelgani aniqlandi. Bu haqda poytaxt IIBB axborot xizmati xabar berdi.
Qayd etilishicha, 32 yoshli M. ismli shaxs 2022-yilning iyun oyida internet tarmog‘i orqali “Mygovuz.net” xostingini yaratib, Yagona interativ davlat xizmatlari portalida mavjud amaldagi transport vositalari oynalari tusini qoraytiruvchi ruxsatnomadan ko‘chirma olgan.
U Photoshop dasturi orqali ruxsatnomadagi maʼlumotlarni o‘zgartirish yo‘li bilan soxtalashtirib, 2022-yilning iyul oyidan 2023-yilning mart oyiga qadar o‘zining jinoiy sheriklari bilan jami 261 nafar fuqaroga ushbu qalbaki ruxsatnomalarning har birini 2,4 million so‘mgacha bo‘lgan narxda sotib kelgani aniqlangan.
Mazkur holat yuzasidan jinoiy guruhga Jinoyat kodeksining 168-moddasi (firibgarlik) 4-qismi “a” bandi va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) 2-qismi “b” bandi bilan jinoyat ishi qo‘zg‘atilib, ularga nisbatan qamoqqa olish ehtiyot chorasi qo‘llanilgan.
O‘zbekistonda tonirovka tartibi
2022-yil 1-iyuldan boshlab yengil avtotransport vositalarining orqa yon oynalari tusini o‘zgartirish (qoraytirish) uchun ruxsatnoma olish tartibi bekor qilingan. Jismoniy va yuridik shaxslarning yengil avtotransport vositalari old yon oynalari tusini o‘zgartirishga (qoraytirishga) ruxsatnoma berganlik uchun to‘lov miqdori bazaviy hisoblash miqdorining sakkiz baravari etib belgilangan.
“Tonirovka” uchun ruxsatnomani Yagona interaktiv davlat xizmatlari portali bilan bir qatorda ichki ishlar organlari yo‘l harakati xavfsizligi bo‘linmalari tomonidan ham olish mumkin. Ushbu ruxsatnoma avtomobil sotilganda va davlat raqami o‘zgartirilganda ham saqlanib qoladi.
Izoh (0)