Strategik islohotlar agentligi O‘zbekistonda avtomobil oynalarini ruxsatnomasiz qoraytirganlik uchun belgilangan jarima miqdorini kamaytirishni taklif qildi. Bu haqda agentlik rasmiy saytida xabar berildi.
Xabarda keltirilishicha, agentlik maʼmuriy choralar va ularning sodir etilgan huquqbuzarlikka mutanosibligini o‘rgangan. Natijalarga qaraganda, mamlakatda maʼmuriy jarimalar miqdorini belgilash mexanizmlari yo‘qligi sodir etilgan huquqbuzarlikka nisbatan nomutanosib jarima solinishiga sabab bo‘lmoqda.
“Masalan, avtomobil oynalarini ruxsatnomasiz qoraytirganlik uchun nazarda tutilgan 8,5 million so‘mlik jarima belgilanganda, ruxsatnomaning narxi 11–13 million so‘m bo‘lgan. Bugungi kunda ruxsatnoma 2,7 million so‘m etib belgilangan, ammo jarima miqdori o‘zgarishsiz qolmoqda”, deya qayd etgan agentlik.
Taqqoslanishicha, Qozog‘istonda avtomobil oynasini qoraytirganlik uchun o‘rnatilgan jarima 468 ming so‘mni, Rossiyada 60 ming so‘mni, Belarusda 138 ming so‘mni tashkil qiladi.
“Fuqarolarning sog‘lig‘i va hayoti xavfsizligi bilan bog‘liq qoidabuzarliklar avtomobil oynalarini ruxsatnomasiz qoraytirish uchun belgilangan jarimalardan ustuvorlik jihatidan muhimroq hisoblanadi”, deyiladi xabarda.
Maʼlumot uchun, respublikada “tonirovka” uchun ruxsatnoma bir yil muddatga beriladi. “Maʼmuriy javobgarlik to‘g‘risidagi kodeks”ining 126-moddasiga ko‘ra, texnik reglamentga muvofiq bo‘lmagan ko‘zgusimon va tusi o‘zgartirilgan (qoraytirilgan) oynali transport vositalaridan, xuddi shuningdek, haydovchining o‘rnidan tevarak-atrofni ko‘rishni cheklaydigan qo‘shimcha narsalar o‘rnatilgan yoki qoplamalar surtilgan transport vositalaridan foydalanish (bundan oynalar tusini o‘zgartirish (qoraytirish) uchun tegishli ruxsatnoma berilgan transport vositalari mustasno) BHMning 25 baravari miqdorida jarima solishga sabab bo‘ladi. Xuddi shunday huquqbuzarlik maʼmuriy jazo chorasi qo‘llanilganidan keyin bir yil davomida takror sodir etilgan bo‘lsa, BHMning qirq baravari miqdorida (13,6 million so‘m) jarima solishga sabab bo‘ladi.
Izoh (0)