Chetga ishlashga ketgan fuqarolarga ham O‘zbekistonda ipoteka krediti olish imkoniyati beriladi. Bu prezidentning 21-fevraldagi farmoni bilan tasdiqlangan “yo‘l xaritasi”da belgilandi.
-uF-ptM2a.jpg)
Unga ko‘ra, chet elda vaqtincha mehnat faoliyatini amalga oshirayotgan shaxslar va salbiy kredit tarixiga ega bo‘lgan fuqarolar uchun ipoteka krediti va subsidiyadan foydalanish imkoniyatini kengaytirish ko‘zda tutilgan. Bu vazifa Markaziy bankka topshirilgan bo‘lib, ijro muddati etib 2025-yil 1-aprel ko‘rsatilgan.
Iqtisodiyot va moliya vazirligi ham ushbu sanagacha ipoteka kreditini ajratishda banklarning xatarlarini kamaytirishga xizmat qiluvchi davlat ipoteka kafolatini taqdim etish mexanizmini joriy qilish bo‘yicha Vazirlar Mahkamasiga taklif kiritishi lozim.
Soliq qo‘mitasi Iqtisodiyot va moliya vazirligi bilan birga ko‘p kvartirali uy-joylardagi yangi turar va noturar joylarni qurilish tashkilotlaridan to‘lovni tijorat banki orqali amalga oshirib sotib olgan fuqarolarga to‘langan qo‘shilgan qiymat solig‘i summasining bir qismini keshbek sifatida qaytarish bo‘yicha taklif ishlab chiqish va Prezident administratsiyasiga kiritishi belgilandi.
Prezident raisligida ipoteka dasturi doirasida 2024-yilda amalga oshirilgan ishlar va 2025-yil uchun rejalar muhokamasi yuzasidan o‘tkazilgan videoselektor yig‘ilishida mamlakatda aholiga rasmiy ish joyi bo‘lmasa ham, daromadini deklaratsiya asosida hisobga olib, ipoteka krediti olishi uchun imkoniyat yaratilgan. Lekin hozirda xorijga ishlashga ketganlarga “O‘zbekistonda rasmiy daromadi yo‘q” degan vaj bilan kredit va subsidiya berilmayotgani qayd etib o‘tilgandi.
Prezident mutasaddilarga xorijda mehnat qilayotgan va olti oy ichida muntazam pul o‘tkazib kelayotgan fuqarolar daromadini hisobga oladigan tizim yaratishni topshirgandi.
O‘zbekistonda 2024-yilda jami 17,1 trln so‘m miqdoridagi ipoteka kreditlari ajratilib, 59 ming nafarga yaqin fuqarolar uy-joy bilan ta’minlandi. 2025-yilda ipoteka kreditlari bo‘yicha dastlabki badal va foiz to‘lovlarining bir qismini qoplash uchun subsidiyalar 1,5 baravarga oshiriladi. Mazkur maqsadlarga davlat byudjetidan 2,5 trillion so‘m yo‘naltiriladi.
Ipoteka kreditlari uchun subsidiya olishga arizalar qabuli 3-martdan boshlanadi. Dastur doirasida 30 000 nafar talabgorga ipoteka kreditlari bo‘yicha subsidiyalar ajratish belgilanmoqda.
2025-yil 1-maydan qurilishni boshlashdan foydalanishga ruxsatnoma berishga qadar bo‘lgan jarayonlar to‘liq onlayn rejimida “Shaffof qurilish” tizimida amalga oshiriladi. Buzilayotgan turar va noturar joy obyektining bozor qiymati to‘liq qoplab beriladi.
Yangi quriladigan uylar markazlashtirilgan isitish tizimiga ulanib, elektr plitalari bilan jihozlash rejalashtirilgan.
Izoh (0)