O‘zbekistonning qaysi hududidan ko‘proq ipoteka krediti olingani maʼlum qilindi

Markaziy bank 2024-yilning olti oyi davomida aholiga ajratilgan ipoteka kreditlari bo‘yicha maʼlumot berdi.

Qayd etilishicha, yanvar—iyun oylarida O‘zbekiston aholisiga 6,88 trillion so‘m miqdorida ipoteka kreditlari ajratilgan. Bunda respublikada jami 23 ming 201 nafar fuqaro banklardan foizli qarz olgan bo‘lib, ularning 16,9 nafari erkaklar (4 trillion 32 milliard so‘m), 9,2 ming nafari xotin–qizlar (2,4 trillion so‘m) hissasiga to‘g‘ri kelgan.

Ipoteka kreditlarining 61 foizi birlamchi bozordagi uylarga, 39 foizi ikkilamchi bozordagi uylarga ajratilgan. Foizli qarzlarning 70 foizini 31–50 yoshlar oralig‘idagi insonlar, 20 foizini 18–30 yoshdagilar, 10 foizini 50 yoshdan yuqori bo‘lganlar olgan.

Shu yilning olti oyi ichida banklarning o‘z mablag‘lari hisobidan ajratgan ipoteka kreditlari yillik 23,3–25,1 foizdan (foizlar har oy o‘zgarib turgan), “Yangi tartib” doirasida yo‘naltirilgan foizli qarzlar yillik 17,3–17,9 foizgacha berilgan.

Yanvar–iyun oylarida “Yangi tartib” dasturi bo‘yicha mamlakatning 13,7 ming fuqarosiga 3,2 trillion so‘m miqdorida ipoteka kreditlari ajratilgan.

Eng ko‘p kreditlar Samarqand viloyati aholisiga berilgan — 424 milliard so‘m. Keyingi o‘rinlarda Farg‘ona viloyati (415,1 milliard so‘m), Toshkent shahri (340,9 milliard so‘m), Andijon (331,5 milliard so‘m) viloyatiga nisbatan ko‘p miqdorda ipoteka kreditlari ajratilgan.

Markaziy bankning maʼlum qilishicha, respublikada 2019-yilda aholiga 7,9 trillion so‘mlik ipoteka kreditlari ajratilgandi. 2020-yilda bu miqdor 9,1 trillion so‘mga, 2021-yilda 9,8 trillion so‘mga, 2022-yilda 14,4 trillion so‘mga, 2023-yilda esa 16,9 trillion so‘mga yetgan.

Avvalroq barcha birlamchi bozordagi uylarga ipoteka kreditlarini ajratish bo‘yicha loyiha ishlab chiqilayotgani aytilgandi. Bu haqda asosiy stavkani ko‘rib chiqish bo‘yicha Boshqaruv yig‘ilishi qarori yuzasidan o‘tkazilgan matbuot anjumanida O‘zbekiston Markaziy bank raisi Mamarizo Nurmurodov ma’lum qilgan edi.