Farg‘ona viloyati Beshariq tumanida avtomobil lyukidan tanasini chiqarib, soxta pul sochgan yigitga chora ko‘rildi. Bu haqda viloyat IIB axborot xizmati xabar berdi.
Ijtimoiy tarmoqlarda avtomobil salonidan chiqib, pul sochayotgan yigit aks etgan video tarqalib, keng muhokamalarga sabab bo‘ldi.
Qayd etilishicha, mazkur holat yuzasidan to‘plangan hujjatlar Jinoyat ishlari bo‘yicha Beshariq tumani sudida ko‘rib chiqilgan.
Akamning to‘yidagi to‘y kortejida pul sochgan edim. Bu harakatimni qo‘l telefonimga videoga olib, ijtimoiy tarmoqlarga joyladim. So‘ngra mening ushbu xatti-harakatlarimning noto‘g‘ri ekanligini tushuntirishdi. Bu ishimdan pushaymonman, tengdoshlarimga ham tavsiya qilmayman, — deydi huquqbuzar yigit.
Unga ko‘ra, pul sochgan yigit Ma’muriy javobgarlik to‘g‘risidagi kodeksning 183-moddasida (mayda bezorilik) nazarda tutilgan huquqbuzarlikni sodir etgan deb topilib, unga nisbatan 10 sutka maʼmuriy qamoq jazosi tayinlandi.
Bir necha kun oldin Qo‘qon shahrida yo‘lda tanasini avtomobil lyukidan chiqarib, soxta pul sochgan shaxs va haydovchiga chora ko‘rilgan edi. Yanvar o‘rtalarida esa Samarqand viloyatida guruh bo‘lib qoidalarni buzgan holda harakatlangan Gentra haydovchilari va tanasini mashinadan chiqarib soxta dollar sochgan shaxslar javobgarlikka tortilgandi.
Izoh (0)