Aliment to‘lamagani uchun qidiruvda bo‘lgan ota Orol dengizi bo‘yidan topildi

Aliment to‘lamagani uchun qidiruvda bo‘lgan ota Orol dengizi bo‘yidan topildi, deb xabar bermoqda MIB axborot xizmati “Daryo”ga.

Ma’lum qilinishicha, Majburiy ijro byurosi Qo‘ng‘irot tuman bo‘limi ish yurituvidagi Fuqarolik ishlari bo‘yicha Nukus tumanlararo sudi buyrug‘iga asosan qarzdor T.F.dan voyaga yetmagan farzandlari ta’minoti uchun sobiq turmush o‘rtog‘i foydasiga aliment undirish belgilangan.

Qarzdor aliment pullarini to‘lashdan qochib yurgani sababli unga nisbatan Majburiy ijro byurosi Qo‘ng‘irot tuman bo‘limi davlat ijrochisi tomonidan 2023-yili qidiruv e’lon qilingan.

Qarzdor T.F.ning aliment to‘lovlaridan qarzdorligi hozirda 18,2 mln so‘mni tashkil etgan. Byuroning Qoraqalpog‘iston Respublikasi boshqarmasi qidiruv sho‘basi xodimlari tomonidan olib borilgan ma’lumotlarni to‘plash tadbirlari davomida qarzdor T.F Mo‘ynoq tumani, Orol dengizi bo‘yi hududlarida ishlab yurgani aniqlangan. 

Byuroning Qoraqalpog‘iston Respublikasi boshqarmasi va Qo‘ng‘irot tuman bo‘limi xodimlari tomonidan birgalikda amalga oshirilgan tezkor qidiruv tadbirlarida qidiruvda bo‘lgan qarzdor T.F. Orol dengizi bo‘yida artemiya sistasini yig‘ish bilan shug‘ullanib yurganida topilgan. 

Qarzdorga nisbatan ma’muriy bayonnoma rasmiylashtirilib, to‘plangan hujjatlar Jinoyat ishlari bo‘yicha Qo‘ng‘irot tuman sudiga yuborilgan va ushbu sud tomonidan qarzdor T.F.ga nisbatan 15 sutka ma’muriy qamoq jazosi qo‘llangan.