Метан заправкада газ етмаётгани учун эътироз билдириб, масъулларни танқид қилган Ғайрат Дўстов суд ҳукми билан 15 суткага қамалганди. “Дарё” мухбирининг хабар қилишича, фуқаро ва унинг адвокатлари томонидан келтирилган апелляция шикоятларига асосан унга оид маъмурий ҳуқуқбузарлик тўғрисидаги иш бугун, 3 январь куни кўриб чиқилмоқда.
Хабарга кўра, Ғайрат Дўстовни судда 12 нафар адвокат ҳимоя қилмоқда. Судланувчи адвокат сўровига жавобан судга Тошкент шаҳар ИИББдан олиб келинаётганини айтган.
Аппеляция суди жараёнида Ғайрат Дўстовнинг тоби қочган.
“Унга ёрдам кўрсатилмоқда ва суд қисқа танаффус эълон қилди”, дейилади мухбир хабарида.
Ғайрат Дўстов суд мажлисида яқинлари ва адвокатларининг саволларига жавоб берар экан, бошига қоп кийдиришганини, ертўлада сақлашганини айтган.
“Нима бўлганда ҳам, Ватанга хиёнат қилмадим, хиёнатчи эмасман”, дея бир неча марта такрорлаган судланувчи. Ҳозирча у нега бундай дегани номаълум. Суд давом этмоқда.
Эслатиб ўтамиз, аввалги суд ҳукмида Ғайрат Дўстов 2024 йил 23 декабрь куни Тошкент шаҳар Бектемир туманида жойлашган заправкада шохобча ходимларини турли сўзлар билан ҳақоратлаб, жамоат тартибини бузиб, майда безорилик қилгани ёзилган.
Жиноят ишлари бўйича Бектемир туман суди раиси Д.А.Дадаханованинг 26 декабрдаги қарори билан Ғ.Дўстов Маъмурий жавобгарлик тўғрисидаги кодекснинг 183-моддаси (майда безорилик)да назарда тутилган ҳуқуқбузарликни содир этган деб топилган ва 15 сутка маъмурий қамоқ жазоси тайинланган. Шунингдек, ундан Тошкент шаҳар ИИББ Маъмурий тартибда қамоққа олинган шахсларни сақлаш махсус қамоқхонаси фойдасига қамалганларни сақлаш билан боғлиқ бўлган харажатлар учун маъмурий қамоқнинг ҳар бир суткаси учун базавий ҳисоблаш миқдорининг 15 фоизи миқдорида, жами 843 минг 750 сўм ундириш белгиланган.
Изоҳ (0)