Toshkent shahrida milliylikni keng targ‘ib qilish rejalashtirilmoqda. Poytaxt hokimi Shavkat Umurzoqov 21-yanvar kuni “Toshkent shahrida milliylikni keng targ‘ib qilishga doir qo‘shimcha chora-tadbirlar to‘g‘risida”gi qarorni imzoladi.
Unga ko‘ra, “Mahalliy davlat hokimiyati to‘g‘risida”gi qonun, prezidentning farmon va qarorlariga muvofiq Toshkent shahrining ijtimoiy-madaniy rivojlanishini ta’minlash, milliy qadriyatlarni asrab-avaylash, o‘zbek xalqining milliy boy madaniy merosini targ‘ib qilish, poytaxt aholisining milliy liboslarga e’tiborini qaratish orqali estetik didini oshirish, turizmni rivojlantirish maqsad qilingan.
Qaror bilan milliylikni keng targ‘ib qilish bo‘yicha Toshkent shahar ishchi guruhi tarkibi, milliylikni keng targ‘ib qilishga qaratilgan “Milliy Toshkent” loyihasi asosida amalga oshiriladigan ishlar yuzasidan chora-tadbirlar rejasi tasdiqlandi. Ishchi guruh 15 kishidan iborat bo‘lib, unga Toshkent shahar hokimining o‘rinbosari — Oila va xotin-qizlar boshqarmasi boshlig‘i Shahnoza Sultanova rahbarlik qiladi.
Ishchi guruhining asosiy vazifalari quyidagilar:
- milliy liboslar va milliylikni ommalashtirishga oid targ‘ibot materiallarini ishlab chiqish;
- korxona, muassasa va tashkilotlar hamda mahalla fuqarolar yig‘inlari bilan hamkorlikni tashkil etish;
- ommaviy tadbirlar davrida milliy liboslar va milliylikning mavqeini mustahkamlanishini ta’minlash;
- milliy liboslar ishlab chiqaruvchi tadbirkorlik subyektlarini qo‘llab-quvvatlash;
- mavzuga oid o‘quv-seminarlari, tanlovlar va boshqa tadbirlarni tashkil etish;
- qarorning bajarilishi yuzasidan doimiy nazoratni amalga oshirish.
Toshkent shahar hokimining o‘rinbosarlari, boshqarma va tashkilotlar, tuman hokimliklari milliy liboslarda yurishni, milliylikni targ‘ib qilishni va milliy madaniyatni rivojlantirishni qo‘llab-quvvatlash maqsadida moddiy va ma’naviy rag‘batlantirish choralarni ko‘radi.
Hujjatga ko‘ra, Toshkent shahridagi davlat tashkilotlari, boshqarma va muassasalarda haftaning har juma kuni “Milliy liboslar kuni” deb belgilanadi va barcha korxona, muassasa va tashkilotlarning jamoalarida targ‘ib qilinadi. Toshkent shahar va tuman hokimliklari, hokimliklar qoshidagi boshqarma, tashkilot va bo‘limlar, boshqa davlat organlari va muassasalari xodimlari ish kunlarida milliy liboslarda yurishi tavsiya etiladi (tasdiqlangan xizmat kiyimlari bundan mustasno). Xodimlarning milliy liboslarda yurishi uchun alohida shart-sharoitlar yaratib beriladi.
Bundan tashqari, shahar miqyosida o‘tkaziladigan barcha ommaviy tadbirlar (bayramlar, festivallar, ko‘rgazmalar, sport musobaqalari, konsertlar va boshqalar) milliy uslubda bezatilishini hamda ishtirokchilarning milliy liboslarda bo‘lishini ta’minlash choralari ko‘riladi. Ommaviy tadbirlarda eng yaxshi milliy liboslar namoyishi, milliy o‘yinlar, milliy raqs va qo‘shiqlar tanlovlari o‘tkazilib, g‘oliblarga sovg‘alar hamda diplomlar berib borilishi tashkil etiladi.
Jamoat transportlari, metro vagonlari va bekatlarda “Milliy libos barchaga yarashadi” shiori ostida milliylikni targ‘ib qiluvchi foto va videomateriallar joylashtirilishi ko‘zda tutilgan.
Milliy qadriyatlar va milliy liboslar mavzusida turli tanlovlar, viktorinalar, o‘yinlar hamda boshqa tadbirlar tashkil etilishi hamda ushbu ko‘rik-tanlov va “chellendj”lar o‘tkazilib, unda faol ishtirok etganlar hokimlik tomonidan munosib rag‘batlantirilishi rejalashtirilgan.
Izoh (0)