50 juftlik qatnashgan katta to‘y, Yevropa bo‘ylab to‘rt kunlik sayohat va to‘ydan olti oy oldin nishonlangan marosimlar Ambanilar oilasi o‘tkazgan tadbirlarning bir nechtasi edi xolos. Ular Hindistondagi eng badavlat oila bo‘lib, 12-iyul kuni ularning kenja farzandi — Anant Ambani farmatsevtika kompaniyasining merosxo‘ri Radhika Merchantga uylandi.
Kurashchi Jon Sina havorang shervani kiyib, gilamdan o‘tayotganda fotograf “Hindistonga xush kelibsiz!” deya xitob qildi. Tillarang lehenga kiygan hind aktrisasi Priyanka Chopra Anant va Radhikaning to‘yiga turmush o‘rtog‘i xonanda Nik Jonas bilan keldi — u xotinining kiyimiga hamohang bo‘lgan och pushti rangli shervanida ko‘rinish berdi.
Bollivud yulduzi Shohrux Xon zaytun rangidagi libosda suratga tushdi, uning rafiqasi, prodyuser va dizayner Gauri Xon esa yaltiroq libosda barchaning e’tiborini tortdi.
To‘yda to‘q rangli milliy libos kiygan aktyor Sanjay Datt hind aktrisasi Madhuri Diksit bilan birga keldi.
Mashhur aktrisa paparatssilarni tanlagan libosi bilan emas, balki ajoyib qomati bilan hayratda qoldirdi — nozik beli va baquvvat qo‘llari tufayli Madhurini yaqinda 57 yoshga to‘ldi, deb o‘ylamaysiz ham.
Mehmonlar ro‘yxatida fevral oyida juftlikning to‘y oldidan bo‘lib o‘tgan tadbirida qatnashgan BP neft kompaniyasining sobiq bosh direktori Bob Dadli ham bor edi. Uning yorqin ko‘k pidjaki boshqa kiyimlar orasida ajralib turdi va Dadlini ancha yosh ko‘rsatdi. Shuningdek, Xalqaro futbol federatsiyasi prezidenti, qora kostyum kiygan Janni Infantino va hindcha libosda Disney malikasiga o‘xshab qolgan rafiqasi Lina Al Ashkar ham boshqalardan qolishmadi.
Buyuk Britaniya sobiq bosh vaziri Toni Bler va uning rafiqasi Cheri Bler qora va qizil kombinatsiya bilan uyg‘unlikda bir-birlarining obrazlarini to‘ldirib turdi.
Yana bir mashhur juftlik Shahid Kapur va uning rafiqasi, kinoprodyuser Mira Rajput nafaqat to‘y marosimiga, balki Ambanilar tomonidan uyushtirilgan to‘y oldi tadbirlariga ham ko‘rk bag‘ishladi.
Izoh (0)