O‘zbek san’ati vakillari orasida ijoddan tashqari, boshqa sohalarda ham faoliyat yuritadiganlar bisyor. Ular hunarli ekanligidan faxrlanadi va ijoddan tashqari bu faoliyat turi bilan ham shug‘ullanadi. Quyida ana shunday san’atkorlar haqida so‘z boradi.
Ra’no Shodiyeva
Ra’no Shodiyeva o‘zbek kinosidagi eng mahoratli aktrisalardan biri hisoblanadi. U “Vatan”, “Qo‘rg‘oshin”, “Baron” va “Berlin—Oqqo‘rg‘on” filmlarida muvaffaqiyatli rollarni ijro etgan. Shu bilan birga, u imkoniyati cheklangan insonlarga ko‘mak berish maqsadida “Mehrli qo‘llar” yoshlar va bolalar markazini tashkil etgan.
— Surdo tili oilamiz uchun yangilik emas. Chunki dadamning eshitish bilan bog‘liq nuqsoni bo‘lgani uchun bolaligimizdan bu tilni o‘rganishga va u orqali dadam bilan erkin muloqot qilishga harakat qilganmiz. 2003-yili uch oylik kursga qatnadim va surdo tarjimoni mutaxassisligini egalladim. Hozirgi kunda bu tilda erkin muloqot qilolaman. Hatto farzandlarim ham buni o‘rganishgan.
Bolaligimdan imkoniyati cheklangan insonlarga befarq bo‘lmaganim uchun “Qo‘llar yordamida gaplashamiz” nomli tashkilotni yo‘lga qo‘ygandim. Undan keyin uning qamrovi yanada mukammallashib, eshitish, ko‘rish, gapirish bilan bog‘liq imkoniyati cheklangan bolalar va yoshlar tashkilotini tuzdik. Hozirgi kunda rahbarligimdagi “Mehrli qo‘llar” yoshlar va bolalar markazi imkoniyati cheklangan qatlam vakillarining hayotga moslashuvchanligini oshirishga o‘z hissasini qo‘shmoqda, — deydi aktrisa Ra’no Shodiyeva.
So‘g‘diyona Azimova
2011-yili kino olamiga kirib kelgan So‘g‘diyona Azimova o‘ndan ortiq muvaffaqiyatli film va seriallarda suratga tushgan. Ammo u aktrisalik bo‘yicha hech qanday mutaxassislikka ega emas. U 15 yillik tajribaga ega stilist hisoblanadi.
— Bolaligimdan sartaroshlar faoliyatiga qiziqqanim uchun shogirdlikka tushib, sohaning sir-asrorlarini o‘rganganman. Stilistlik faoliyatimni 2007-yilda boshlaganman. U paytlarda aktrisa bo‘lishni hayolimga ham keltirmagandim. Bu sohada 15 yil faoliyat yuritdim va bu yildan boshlab sog‘lig‘im sabab biroz tanaffus qilishga majbur bo‘ldim. Tik oyoqda turolmayapman. Shu bois asosiy e’tiborimni seriallardagi ishtirokimga qaratdim. Hozir ikkita serialda suratga tushyapman, — deydi So‘g‘diyona Azimova.
Muzaffar Sa’dullayev
“Osmondagi bolalar” filmidagi Hamdam roli bilan tomoshabinlarga yaxshi tanish bo‘lgan Muzaffar Sa’dullayev ham professional aktyor emas. U hisobchilik diplomiga ega, hunarmand hisobladi.
— 1994-yili tog‘am nabiralarning kattasi temirchilikni o‘rgansin, deb “Chorsu” bozoridagi ustaga shogirdlikka bergan. Besh yil davomida temirchilikning sir-asrorlarini o‘rganganman. Maktabni tamomlagach, buxgalteriya sohasi bo‘yicha tahsil olganman. Dadam “O‘zbekfilm”da ishlagani uchun men ham bir muddat kino sohada ishladim.
Hozir “Chorsu” tunuka bozoridagi rastalarning birini band etganmiz. Kinosyomkalar har doim ham bo‘lmaydi, ammo qozon har kuni qaynashi kerak. Shu bois o‘tgan vaqt mobaynida tunukachilikdan uzoqlashmaslikka harakat qildim. Nasib qilsa, ikkita kinoloyihada chala ishim qoldi. Ularni tamomlasam, san’atdan butunlay ketishni niyat qilganman, — deydi Muzaffar Sa’dullayev.
Yorqinoy G‘oziyeva
Aktrisa va kinoprodyuser Yorqinoy G‘oziyeva “Farzandim-2”, “Tubanlik” va “O‘jar kelin” kabi filmlarda muvaffaqiyatli rollarni ijro etgan. U salomatligidagi muammo sabab massajistlikni o‘rgangan.
— Boshidan o‘tkazgan tabib, deb bejiz aytishmaydi. Avvaliga onam, undan keyin o‘zim umurtqa bilan bog‘liq xastalikka chalinganmiz. Shundan keyin fizioterapiya sohasini o‘rganishga qaror qilganman. Hozirgi kunda 10 yillik tajribaga ega davolovchi massajistman. Hunarli odam och qolmaydi, deb bilganim uchun shu kungacha tikuvchilik va qandolat mahsulotlarini tayyorlashni ham o‘rganganman. Kino syomkalari yo‘q paytda to‘ylar uchun buyurtma tortlar ham pishirib sotganman, — deydi aktrisa Yorqinoy G‘oziyeva.
Ozod Shukrulloyev
Ozod Shukrulloyev — Zo‘r TV telekanalining “Stand up” ko‘rsatuvi orqali tomoshabinlar e’tiboriga tushgan. U hozirda partnyori Maftuna Shokirova bilan hamkorlikda Instagram uchun vaynlar tayyorlamoqda. Uning sahifasini 858 mingta obunachi kuzatadi. Ozodning aslida professional shifokor ekanligini ko‘pchilik bilmasligi mumkin.
— O‘tgan yili Toshkent tibbiyot akademiyasini tamomladim. Mutaxassisligim bo‘yicha jarrohman. Hozirgi kunda xususiy klinikalarning birida plastik jarroh sifatida faoliyat yuritaman. Ikki ishim bir-biriga xalal bermayapti, — deydi Ozod Shukrulloyev.
Shahzoda Muhammedova
Aktrisa va teleboshlovchi Shahzoda Muhammedova aslida kino olamiga libos ustasi sifatida kirib kelgan. Ammo unda filmlarda suratga tushish ishtiyoqi ham baland bo‘lgan. “Tundan tonggacha” filmidagi ishtirokidan so‘ng tomoshabinlar uni aktrisa sifatida kashf etishdi. Ammo u aktrisalikdan tashqari milliy va xalqaro moda festivallarida ishtirok etadigan mahoratli dizayner hisoblanadi. U yaqinda Italiyaning Milan shahrida o‘tkaziladigan Milan Fashion Week xalqaro moda haftaligida ham ishtirok etgan.
— Bolaligimdan dizaynerlik sohasiga qiziqaman. Maktabni bitirgach, Binkov nomidagi Respublika rassomlik kollejida tahsil olganman. Ammo yaqinlarim tavsiyasi bilan Toshkent davlat Iqtisodiyot universitetida tahsil olganman. Lekin diplom bo‘yicha ishlay olmadim.
Otamning orzularini amalga oshirish uchun meros qolgan binoda ilk dizaynerlik uyimni tashkil qildim. Albatta, buni amalga oshirishda buvim va onam ko‘maklashishgandi. Hozirgi kunda dizaynerlik uyi ancha kengaygan. Turmush o‘rtog‘imning taklifi bilan alohida bino ham tashkil etdik. “Shahzoda Muhammedova” dizaynerlik uyining viloyatdagi filiallari ham tashkil etilgan, — deydi Shahzoda Muhammedova.
Malika Rahimova
Malika Rahimova 2017-yildan buyon O‘zbek davlat drama teatrida faoliyat yuritadi. U “Otasining qizi”, “Sab’ayi sayyor”, “Jamila”, “Trufaldino – ikki boyga bir malay”, “Ming bir kecha” spektakllarida bosh rollarni ijro etgan. Chingiz Aytmatovning 90 yilligiga bag‘ishlab “Aytmatov va teatr” xalqaro teatrlar festivalida “Jamila” spektakli bilan qatnashib, “Yilning eng yaxshi ayol roli uchun” mukofotlangan.
— O‘zbekiston davlat san’at va madaniyat institutida shartnoma asosida o‘qiganman. Ikkinchi kursda moliyaviy qiyinchiliklar sabab ishlashimga to‘g‘ri kelgan. Bolaligimda kriminal sohaga qiziqqanim uchun o‘zimni shunga yaqin sohada sinab ko‘rganman. Kameralar orqali o‘g‘rilik holatlarini aniqlash bilan shug‘ullanardik. Ishimiz juda qiziq edi. Bo‘lim boshlig‘imiz Ergash Komilov sizga mos ish bor, dedi.
Afsuski, o‘sha paytda diplom spektakliga tayyorgarlik ko‘rayotganim uchun ishni rad etishimga to‘g‘ri keldi. Institutni tamomlab, teatrga ishga bordim. Lekin bo‘sh ish o‘rni yo‘qligini aytishdi. Ergash Komilov bilan bog‘lanib, yangi ish haqida so‘radim. Ish u qadar qiyin emasligini va uch kunda bir marotaba ishga borishim kerakligini aytishdi. Hozirgi kunda Toshkent markaziy vokzalida nozir va O‘zbek davlat drama teatrida aktrisa sifatida ishlayman. Biz yo‘lovchilar xavfsizligiga javob berib, ularning hujjatlari va yuklarini nazoratdan o‘tkazamiz.
Turmush o‘rtog‘im Kamol Rahimov “Afrosiyob” yo‘nalishidagi poyezdlar qatnovi videokuzatuvida operator bo‘lib ishlaydi. U bilan temiryo‘lda tanishganmiz, — deydi Malika Rahimova.
G‘olib Habibullayev
“Iblis devori”, “Qora ilon” va “Fidoyilar” kabi filmlardagi ishtiroki bilan tomoshabinlarga yaxshi tanish bo‘lgan aktyor G‘olib Habibullayev oilaviy novvoychilik bilan shug‘ullanadi.
— Ota-onam umr bo‘yi novvoychilik bilan shug‘ullanishgan. Ularning oila qurishiga ham shu hunarlari sabab bo‘lgan. Bolalikdan uning sir-sinoatlarini o‘rganganmiz. Hatto o‘quvchilik paytimdan dadam safarga ketganida onam ikkimiz nonlarni yopardik.
San’atdan tashqari novvoychilik bilan ham shug‘ullanaman. Syomkadan bo‘sh vaqtim novvoyxonada o‘tadi. Bu ish bilan shug‘ullanish menga zavq bag‘ishlaydi, — deydi G‘olib Habibullayev.
Madina Mumtoz
Ijodini xonandalikdan boshlagan Madina Mumtoz aktrisa sifatida ham bir nechta filmlarda suratga tushgan. Xususan, “Mening dadam bo‘ydoq”, “Bevalar”, “Janob hech kim”, “O‘zimdan o‘zimgacha” va “Endi dadam bo‘ydoq” kabi filmlardagi rollari tomoshabinlar e’tiboriga tushgan. U hozirgi kunda kino va qo‘shiqchilik sohasida faoliyat yuritmay, o‘zini yangi yo‘nalishlarda sinab ko‘ryapti.
— Bolaligimdan oshpazlik sohasiga qiziqqanman. Bu sohani mustaqil o‘rganish bilan birga, bir necha kurslarga ham qatnaganman. Shu yili Istanbulda “Turk oshpazlari akademiyasi”da oshpazlik bo‘yicha tahsil olib qaytdim. Undan keyin Toshkentdagi eng mohir oshpazlar, mehmonxona oshpazlaridan amaliy saboq oldim. Menga ham o‘rgating, buni qanday tayyorladingiz, degan savollar ko‘p bo‘lgani uchun onlayn kurs ochishga qaror qildim. “Turk taomlari oshpaziman” kursida taomlar bilan birgalikda salat va desertlar ham o‘rgatiladi, — deydi Madina Mumtoz.
Mavzuga doir:
Izoh (0)