DXX soliq idoralari mansabdor shaxslariga nisbatan jinoyat ishi qo‘zg‘atilganini ma’lum qildi.
Korrupsiya va iqtisodiy jinoyatlarga qarshi kurashish bo‘yicha Davlat xavfsizlik xizmati tomonidan olib borilgan tezkor-qidiruv tadbirlari doirasida soliq idoralarining ayrim mansabdor shaxslari moddiy manfaatdorlik evaziga “Barqarorlik reytingi” dasturidagi ma’lumotlarni soxtalashtirish orqali 18 ta xo‘jalik yurituvchi subyektlarga baholarni sun’iy ravishda qo‘shish hamda xavf darajasini olib tashlashlari oqibatida jami 82 mlrd so‘m qo‘shilgan qiymat solig‘ining manfiy summasi byudjetdan noqonuniy qaytarilgani aniqlandi.
Ushbu holat yuzasidan DXX Tergov boshqarmasi tomonidan Jinoyat Kodeksining 167 va 209-moddalari bilan jinoyat ishi qo‘zg‘atildi.
Jumladan, ushbu jinoyat ishi doirasida yog‘och importi bilan shug‘ullanuvchi MCHJ hisobiga 5,5 mlrd so‘m QQSning manfiy summasi byudjetdan noqonuniy qaytarilganligi holati yuzasidan Soliq qo‘mitasining 2 nafar xodimi, shuningdek, MCHJ direktori va hisobchisi hamda 2 nafar norasmiy rahbari gumonlanuvchi tariqasida tergovga jalb qilinib, ularga nisbatan qamoq ehtiyot chorasi qo‘llanildi.
Mazkur shaxslarga tegishli bo‘lgan jami 16 ta obyektda o‘tkazilgan tintuv-tergov harakatlari davomida 79 ming AQSH dollari, 161 mln so‘m, 3 ta LI 9 elektromobil, 2 ta Gentra, 1 ta Nexia 3 avtomashinasi, 1268 blokda “TEREA” nomli elektron sigaret tayoqchalari, 27 ta elektron kalitlar, shuningdek, muhr, kompyuter va telefon apparatlari protsessual tartibda rasmiylashtirib olindi.
Jinoyat ishi doirasida qolgan xo‘jalik yurituvchi subyektlar tomonidan noqonuniy o‘zlashtirilgan byudjet mablag‘lari bo‘yicha ham tergov harakatlari davom etmoqda.
Pora olgan soliqchilar
Zangiota tumanida Soliq inspeksiyasining sho‘ba boshlig‘i vazifasini bajaruvchi shaxs qurilish mollari ishlab chiqarishga ixtisoslashgan oilaviy korxonaning faoliyatiga rahnamolik qilish va 1 yil davomida tekshiruv o‘tkazmaslik evaziga 1200 dollar olgan vaqtida ashyoviy dalillar bilan ushlangandi.
Sirdaryo viloyati Soliq boshqarmasining soliq to‘lovchilarga xizmat ko‘rsatish bo‘limi bosh inspektori Guliston shahrida faoliyat yurituvchi uchta MCHJning soliq qarzlarini, ushbu MCHJlarni soddalashtirilgan tartibda bankrot deb topish yo‘li bilan bartaraf qilib berish evaziga 4 ming dollar olgan vaqtida ashyoviy dalillar bilan ushlangan.
Namangan viloyati Yangiqo‘rg‘on tumani soliq inspeksiyasi katta inspektori bog‘dorchilikka ixtisoslashgan fermer xo‘jalikning 2023 va 2024-yillar uchun yer solig‘idan aniqlangan 11 million 200 ming so‘m miqdoridagi qarzdorligini bartaraf qilib berish evaziga 7 million so‘m, shuningdek, ushbu fermer xo‘jalik rahbarining tanishiga tegishli noturar joyning mol-mulk va yer soliqlaridan bo‘lgan 55 million 100 ming so‘m qarzdorligini ham to‘liq bartaraf qilib berish evaziga 28 million so‘m talab qiladi. U talab qilingan jami 35 million so‘m pul mablag‘ini olgan vaqtida ushlangan.
Izoh (0)