O‘zbekistonda mansabdorlar so‘nggi 4 yilda davlat va jamiyat manfaatlariga qancha zarar yetkazgani ma’lum qilindi

Oliy Majlis Qonunchilik palatasida 3-dekabr kuni “O‘zbekiston Respublikasining Jinoyat kodeksiga korrupsiyaga oid jinoyatlar uchun javobgarlik muqarrarligini ta’minlashga qaratilgan o‘zgartish va qo‘shimchalar kiritish to‘g‘risida”gi qonun loyihasi birinchi o‘qishda qabul qilindi. Bu haqda Senat axborot xizmati xabar qildi.

Ma’lum qilinishicha, mansabdor shaxslarning jinoyatlari oqibatida davlat va jamiyat manfaatlariga 2018-yilda 556 milliard so‘m, 2019-yilda 1,858 trillion so‘m, 2020-yilda 500,1 milliard so‘m, 2021-yilning 9 oyida 658 milliard so‘m moddiy zarar yetkazilgan. Mazkur qonun loyihasi bilan mansabdor shaxslarga nisbatan choralar kuchaytirilmoqda.

Jumladan, “Hokimiyat yoki mansab vakolatini suiiste’mol qilish”, “Hokimiyat yoki mansab vakolati doirasidan chetga chiqish”, “Hokimiyat harakatsizligi”, “Mansab soxtakorligi” va “Hokimiyatni suiiste’mol qilish, hokimiyat vakolatidan tashqariga chiqish yoki hokimiyat harakatsizligi” jinoyatlar agar “g‘arazgo‘ylik” niyatida sodir etilsa, korrupsiyaviy jinoyat hisoblanishi belgilanib, mazkur harakatlar uchun og‘irroq jazolar belgilangan.

Shuningdek, o‘zlashtirish yoki rastrata yo‘li bilan firibgarlik qilish, soliq va boshqa majburiy to‘lovlarni to‘lashdan bosh tortish uchun hukm qilingan, biroq yetkazilgan zararni to‘liq qoplamagan shaxslarga va poraxo‘rlik bilan bog‘liq jinoyatni sodir etgan shaxslarga nisbatan jazodan muddatidan ilgari shartli ravishda ozod qilish yoki jazoni yengilrog‘i bilan almashtirish tatbiq qilinmasligi nazarda tutilgan.

Eslatib o‘tamiz, Oliy Majlis deputatlari pora oldi-berdisi uchun 20 yilgacha ozodlikdan mahrum qilish jazosi ko‘zda tutilgan qonun loyihasini birinchi o‘qishda qabul qilgandi. Qonun loyihasini 107 nafar deputat ma’qullab ovoz bergan, 1 nafari ovoz bermagan, qarshilar va betaraflar yo‘q.