O‘zbekiston, Qozog‘iston va Qirg‘iziston energetika hamda suv xo‘jaliklari vazirlari 14-may kuni Toskentda navbatdagi uchrashuvini o‘tkazdi.
Energetika vazirligi mabuot xizmatining xabar qilishicha, unda mamlakatlar suv-energetika tizimining yoz mavsumida ham barqaror ishlashini taʼminlash masalalari muhokama qilindi. Shuningdek, tarmoqlar ish rejimlarining grafiklari kelishildi.
Mazkur tadbirda tomonlar o‘rtasida hamkorlikda amalga oshirilayotgan loyihalar, xususan, “Qambarota GES-1” qurilishi loyihasining hozirgi holati va suv-energetika balansini muvofiqlashtirish masalalari ham ko‘rib chiqildi.
Uchrashuv yakunlari bo‘yicha tegishli bayonnoma imzolandi hamda yaqin kunlarda kelgusi tadbirlarni muvofiqlashtirilgan tarzda o‘tkazish yuzasidan kelishuvga erishildi.
“Har bir vegetatsiya mavsumi oldidan bunday muhokama o‘tkazish va ish rejimlarini kelishish ayni paytdagi gidrologik vaziyatni hamda mamlakatlarning suv-energetika resurslariga bo‘lgan ehtiyojlarini inobatga olish imkonini beradi”, degan uchrashuvda Qozog‘iston energetika vaziri Erlan Akkenjenov.
Qozog‘iston Energetika vazirligi matbuot xizmatining xabar qilishicha, energetika obyektlarining kelishilgan ish rejimlari va Sirdaryo havzasida kelgusi vegetatsiya davri uchun suv ajratish tartibini belgilovchi bayonnoma imzolanishi Markaziy Osiyoda suv resurslaridan muvozanatli foydalanish va energiya tizimlarining barqaror ishlashini ta’minlashga qaratilgan uch davlatning muntazam hamkorligi doirasidagi muhim qadamdir.
Izoh (0)