“Oʻzbekgidroenergo” AJ – “MACLEC”: suv yuzasida suzib turuvchi kinetik turbinali innovatsion gidroagregatlarni yetkazish boʻyicha shartnoma imzolandi

“Oʻzbekgidroenergo” aksiyadorlik jamiyati tomonidan investitsiyaviy loyihalar asosida yangi gidroenergetik quvvatlarni barpo etish, xususan, zamonaviy talablar asosidagi yangi gidroelektr stansiyalarni qurish, modernizatsiya loyihalarini amalga oshirish, shu bilan birga, istiqbolli sanalgan mikro va kichik GESlarni qurishga katta urgʻu berilmoqda.

Bugun 8-fevral kuni Hindiston poytaxti Nyu-Dehli shahrida ikki tomonlama hamkorlik doirasida navbatdagi tadbir oʻtkazildi.

Tadbirda Madaniy aloqalar boʻyicha Hindiston Kengashi prezidenti Doktor Vinay Saxasravudxe, Milliy energetika korporatsiyasi, “Tehri Hydro Power Corporation” hamda “North-Eastern Electric Power Corporation Limited” korporatsiyalari raisi va boshqaruvchi direktori Shri R.K. Vishnoy, “MACLEC technical project laboratory pvt. LTD” kompaniyasi raisi Narayan Bxardvadj hamda “Oʻzbekgidroenergo” AJ Boshqaruvi raisi A. Sanginov boshchiligidagi delegatsiya qatnashdi.

Tadbirda tarixiy kelishuvga erishildi. Hindistonning “MACLEC technical project laboratory pvt. LTD” kompaniyasi tomonidan ishlab chiqarilgan, quvvati 50 MVt boʻlgan suv yuzasida suzib turuvchi kinetik turbinali innovatsion gidroagregatlarni Oʻzbekistonga yetkazish boʻyicha shartnoma imzolandi. Ushbu hamkorlikning asosiy jihati shundaki, 1-bosqichda gidroagregatlarning 60 foiz mahalliylashtiriladi va gidroagregatlar Oʻzbekiston sharoitida sinovdan oʻtkaziladi. 2-bosqichda ishlab chiqarish 100 foiz mahalliylashtiriladi va hindistonlik injener-muhandislar respublikamizda doimiy ishlashi va bizning mahalliy mutaxassislarimizni gidroagregatlarni ishlab chiqarishga oʻrgatish uchun jalb qilinadi.

Bu borada, Jamiyat xalqaro hamkorlik aloqalarini yanada mustahkamlashga, xorijiy ilgʻor tajribani mahalliylashtirishga ustuvor vazifalardan biri sifatida qaramoqda.

Mazkur tadbirda “MACLEC” kompaniyasi raisi Narayan Bxardvadj hamda Jamiyat Boshqaruvi raisi Abdugʻani Sanginov tomonidan hamkorlikning istiqbollariga alohida toʻxtalib oʻtildi hamda oʻzaro minnatdorchilik tilaklari bildirildi.

Tadbir davomida tomonlar oʻrtasida shartnoma imzolash marosimi oʻtkazildi.

Oʻtgan 2022-yilning avgust oyida Hindistonning “Masles” kompaniyasi rahbarlari bilan gidroenergetika sohasida yangi hamkorlik aloqalarini mustahkamlash borasida ikki tomonlama uchrashuv oʻtkazilgan hamda “Made in Uzbekistan” milliy brendi asosida quvvati 500 kVt gacha boʻlgan mikroGESlar uchun gidroagregatlar ishlab chiqarishni yoʻlga qoʻyish boʻyicha oʻzaro anglashuv Memorandumi imzolangan edi.

Natijada, tizim tashkiloti hisoblangan “Suvsanoatmash” AJ zavodi hamda Hindistonning “MACLEC” kompaniyasi hamkorligida mikroGESlar uchun gidroagregatlar “Made in Uzbekistan” oʻzbek brendi asosida mamlakatimizda ishlab chiqarilishini yoʻlga qoʻyish borasida kelishuvga erishilgan edi. Bu esa, oʻz navbatida, xususiy investorlar tomonidan mikroGESlarni qurishga va davlat-xususiy sherikchiligi asosida kichik GES qurmoqchi boʻlgan tadbirkorlarga keng imkoniyatlar yaratib beradi. GES uchun zaruriy asbob-uskunalarni yurtimizdan arzon va kafolatlangan tarzda xarid qilinishi imkoniyatini beradi.

Joriy yilning 23-yanvar kuni Hindiston poytaxti Nyu-Dehli shahrida “Oʻzbekgidroenergo” AJ Boshqaruvi raisi A. Sanginov boshchiligidagi delegatsiya hamda “MACLEC” kompaniyasi vakillari bilan oʻzaro hamkorlik doirasida oʻtkazilgan navbatdagi uchrashuvda Jamiyat tomonidan Oʻzbekistondagi gidroenergetik salohiyat, xususan, istiqbolli loyihalarni amalga oshirish uchun qulay daryo va kanallar haqidagi maʼlumotlar, hind kompaniyasi tomonidan esa zamonaviy texnologik qurilmalar, xususan, gidroagregatlar borasida maxsus taqdimot taqdim etilgan edi.

Natijada qisqa vaqt ichida har bir daryo va kanallar uchun individual boʻlgan gidroagregatlar modellashtirildi, ularning nominal oʻlchamlari va quvvatlari yangi texnologiyalar yordamida aniqlandi va shu kunlarda ishlab chiqarish jarayonlari boshlanadi.

Jamiyat tomonidan bu boradagi hamkorlik ishlari uzviy davom ettirilib, Xitoy Xalq Respublikasining JINLUN kompaniyasi bilan quvvati 15 MVtgacha boʻlgan gidroagregatlarni ishlab chiqaruvchi yangi zamonaviy texnologiyalar bilan jihozlangan zavodni qurish boʻyicha oʻzaro kelishuvga erishildi. 20-fevralga qadar ushbu hamkorlik bitimi imzolanishi va yangi zavodga tamal toshi qoʻyilishi rejalashtirilmoqda.

Umuman olganda, mahalliylashtirish doirasida samarali loyihalar asosida yoʻlga qoʻyilayotgan, xorijiy ilgʻor tajriba asosida ishlab chiqarilayotgan yangi quvvat qurilmalari va manbalari yangi Oʻzbekiston gidroenergetik salohiyatining ortishiga, toza va arzon elektr energiya manbaini ishlab chiqarish hajmining keskin oshirilishiga, yangi ish oʻrinlarining yaratilishiga, tom maʼnoda, mamlakatimiz iqtisodiyotining rivojlanishiga muhim poydevor boʻladi.

Reklama huquqi asosida.