Сурхондарё вилоятида Музработ туманида аёлига тазйиқ ўтказган эркак қамалди. Бу ҳақда “Ҳудуд” дастурида хабар берилди.
Маълум қилинишича, Музработ туманида яшовчи аёл турмуш ўртоғининг тазйиқи остида қолган. Шу сабабли Ички ишлар бўлими томонидан 28 февраль куни унга ҳимоя ордери берилган.
Шунга қарамай 49 ёшли эркак аёлини яна дўппослаган. 14 март куни спиртли ичимлик истеъмол қилган эркак пули етмагани сабабли турмуш ўртоғининг телефонини дўконга 15 минг сўм эвазига гаровга қўйган. Уйга қайтгач эса аёлига тазйиқ ўтказган.
Ҳолат Жиноят ишлари бўйича Музработ туман судида кўриб чиқилди. Суд ҳукми билан эркакка Маъмурий жавобгарлик тўғрисидаги кодексга асосан 10 сутка қамоқ жазоси тайинланди.
Сирдарё вилоятининг Гулистон шаҳрида яшовчи аёл эри томонидан аёвсиз калтаклангани, сочи калга олингани ҳақида хабар берилганди. Суд ҳукми билан айбдор эркак 2 йил 6 ойга озодликдан маҳрум қилинди.
Энди оилавий зўравонликдан жабрланган шахснинг талабига кўра суд томонидан ярашиш учун муҳлат тайинланмайди.
Амалдаги қонунчиликка кўра оиладаги тазйиқ ва зўравонлик сабаб судга ариза билан мурожаат қилинганда суд эр-хотинни яраштириш учун муайян муҳлат беради. Ушбу берилган муҳлат ичида оилавий низо ва жанжаллар қайта содир этилиши аёлларнинг ўз жонига қасд қилишига, уларга етказилган тан-жароҳатлари эса уларнинг бевақт ўлимига сабаб бўлмоқда.
Қонун билан амалиётга жорий этилиши кутилаётган нормаларга асосан суд ишни кўришни кейинга қолдирилмай ўз вақтида қарор қабул қилади, бу низоли оилаларда мунтазам зўравонлик ҳолатлари ва оғир жиноятлар содир этилишининг олдини олади.
Хусусан, оилавий зўравонликдан жабрланган шахснинг талабига кўра суд томонидан ярашиш учун муҳлат тайинламаслик назарда тутилмоқда.
Изоҳ (0)