Санъатда бир оз муддат танаффус қилган, бош ролларда кўринмай қолган, аммо истеъдодли, таниқли кино ва театр актрисаси Жамила Ғофурова “Даракчи.уз” сайтига интервью берди. Интервью давомида у фарзандлари, иккинчи турмуш ўртоғининг катта қизи билан муносабати ҳамда ўғлини дунёга келтириш чоғида бир ўлимдан қолгани ҳақида гапирди.
“Ўзимга инсоф сўрайман, баъзи ҳаракатларимни тўғрилашим керак”
Жамила Ғофурова авваллари шўх-шодон бўлган бўлса-да, эндиликда оналик ва аёллик вазифаларини тўлиқ адо қиляпти. У йил сари улғайиб бораётгани ва фарзандлари онаси ҳақида ёмон гап эшитмаслиги учун ҳаракат қилиши ҳақида қуйидагича сўзлади.
— Биринчи фарзандим Ширина катта қиз бўляпти, ундан кейин яна бир қизим, ўғлим ҳам бор — шу вақтларда ўзимга “Энди улғайишим керак” деб сўз бердим. Ҳар куни ўзимга ёқмайдиган бир хатойимни тўғрилаб боришга ҳаракат қиламан ва Аллоҳдан бошқаларга эмас, ўзимга инсоф сўрайман. Қизларимнинг орқасидан совчи келишини, ўғилларим дўстларининг ёнида бош кўтариб юришини ўйлайман. Улғаяётганим ўзимга жуда ёқяпти, жуда ҳам. Қанийди ҳозирги ўйловим 20 йил аввал бўлганда эди.
Кун келиб тўртта фарзанднинг онаси бўлишимга, уйда ўтириб бугун ўзи қайси кун, қайси сана деб қолишимга ҳеч ишонмасдим. Сабаби тиниб-тинчимайдиган, сёмкалардан ортмайдиган, бир тадбирдан чиқиб иккинчисига югурадиган қиз бўлганман. Аммо тунда фарзандларимнинг ухлаб ётганини кўриш жуда ёқимли, шу кунларга етиб келганимга беҳисоб шукр қиламан, дейди Жамила Ғофурова.
“Фарзандларим дадасидан қўрқади, бу менга ёқади”
Актриса турмуш ўртоғи, унинг кимлиги ва шахсияти ҳақида гапиришни ёқтирмайди, аммо ўзининг суюкли рафиқа, севимли она ва оғир-босиқ уй бекаси бўлишида эрининг ўрни тўғрисида гапириб ўтди. У нафақат ўзига турмуш ўртоқ, балки қизи Ширина учун ҳам уни ўз фарзандидек кўрадиган ота танлаши керак бўлган.
— Турмуш ўртоғим қаттиққўл инсон. Бу қўрқувда яшамайман, дегани эмас, уларни ҳурмат қиламан. Айнан шу жиҳатларга менга кўп асқатади — уйга кириб келганларидан сўнг фарзандларим 99 фоизга ўзгаради, уйимизда бошқа муҳит пайдо бўлади. Рости, ўша вақтда мен дам оламан. Фарзандларим дадасидан қўрқади, бу менга ёқади. Уйимиздаги ҳар бир иш эримнинг розилиги билан бўлади.
Биз оилада беш фарзанд бўлганмиз, кўпчиликнинг ичида катта бўлганим сабабли ўзимнинг оилам ҳам катта бўлишини хоҳлардим. Мана турмушга чиқдим, фарзандларимни кўпайтирдим. Эрим қаттиққўллигини айтдим, ҳадеб уруш-жанжал бўлаверса оила ажрашиб кетиши мумкин. Жаҳли тез деб ажрашиб кетавермайман-ку. Шу сабабли биз келишиб олганмиз — эрим жаҳлда пайти мен оғирроқ бўлиб тураман.
Эркаклар санъаткор аёлга уйланаётганда унинг санъат вакили эканини билиб уйланади-ю, аммо кейинчалик барибир аёлини ўзгартирмоқчи бўлади. Турмуш ўртоғимга мени ўзгартиришга ҳаракат қилманг, мен сизни борингизча қабул қилиб яшаб келяпман-ку, дейман. Мени ўзгартиришга уринманг, мени боримча қабул қилсангиз биз жудаям чиройли оила бўламиз. Мен ўзимни яхши ҳис қиламан, сиқилмайман, болаларга ҳам етарли меҳримни бераман ва ўз ишимни ҳам севиб қиламан — қарабсиз-ки, мендан бахтли аёл йўқ, деб кўп такрорлайман, деди актриса.
“Қизим ва турмуш ўртоғимнинг муносабатига аралашмайман”
Актриса турмуш ўртоғи ва қизининг муносабати аввал ва бугунги кунда қай даражада экани ҳақида гапирди.
— Отаси қизимга озроқ дакки бериб ё тергаб қоладиган пайтларда қизим Ширина жуда хафа бўлиб қоларди. Отаси ҳам бундан ранжиб, қизим-ку ахир, ота бўлиб озроқ гапирсам нима бўлибди? Аксинча, уришмасам ўгай бўлиб қоламан-ку, дерди. Бу бир неча йил аввалги ҳолат. Яширмайман, ўша пайтларда сиқилиб қолгандим. Аммо ҳозир қизим 15 ёш бўлса-да, катта қизлардек фикрлайди. Нима бўлган тақдирда ҳам мен учун бу инсон Ширинанинг отаси, 7-8 ёшидан бери шундай бўлиб келган. Бирга яшаймиз, муносабатларига кўп ҳам аралашавермайман, оддий ота-қиз муносабати, дейди актриса.
Ширина қизимни 25 ёшимда дунёга келтирганман, яхшиям шу қизимни туғган эканман дейман. Кичик укасини ҳозир ўзи катта қиляпти, менга ёрдамчи. Шу қизим учун ҳам ука ва сингилларини туғганман, кун келиб жигарлар керак бўладиган пайтда нега менинг ука-синглим йўқ, деб мендан ўксимасин деган ўй бўлган, дейди тўрт фарзанднинг онаси Жамила.
“Туғруқ вақтида юрагим тўхтаб қолган”
Жамила Ғофурова 2024 йилнинг 23 мартида тўртинчи бор оналик бахтига эришди — ўғил фарзандли бўлди. Аммо бу бахт актрисага осонликча келгани йўқ, у бир ўлиб, тирилди.
— Фарзандим 30 ҳафталик туғилиб қолди, кичик ўғлимни муддатдан аввал дунёга келтирдим. Мен борган туғруқхонадаги шифокорлар Аллоҳнинг изни билан менга иккинчи марта ҳаёт берди. Шунчалик оғир аҳволда шифохонага боргандим-ки, 5-10 дақиқага юрагим тўхтаб қолган. Ҳушимдан кетгандим, ўша пайтдаги ҳамма гапни ҳам эслолмайман. Аммо бир гап айтишган: “Бу санани эслаб қолинг, Жамила, бу сизнинг туғилган кунингиз”. 23 мартда мен қайтадан “дунёга келдим”. Ҳозир қанчалик кучли шифокорлар менга ёрдам берганини ўйлаб, улардан доим миннатдор бўлиб келаман. Ўша вақтлар яқинларим мени ёлғизлатиб қўймади, турмуш ўртоғим, отам ва иккинчи онам, яъни дадамнинг иккинчи аёли, акам ва келинойим, дугоналарим келиб ҳолимдан хабардор бўлиб туришди. Депрессияга тушиб қолишимга оз қолганди, аммо мени бу ҳолатга тушишимга жим қараб туришмади, уларнинг барчасидан миннатдорман, дейди актриса Жамила Ғофурова.
Изоҳ (0)