Сериалда прокурор қиз Лейла (“Қалбим эшигини қоқ” фильми юлдузи Ҳанде Эрчел ўйнаган) ва ўзининг “яхши” томони билан “ёмон” томони орасида қолиб кетган таниқли телебошловчи Кенаннинг севгиси ҳикоя қилинади. “Маликам, энди қара” сериали билан танилган Кенан — (Дениз Бурак) ота-онасини ҳурмат қилади, оддий одамларга ёрдам беради ва прокурор қизни жуда яхши кўради.
“Ёмон” Кенан даҳшатли жиноятларни содир этади, уни прокурор қиз фош қилиши керак
Биринчидан, бош қаҳрамон эркаклар касбини танлаган қобилиятли қиз. Лейла прокурор, уни Истанбулнинг эркаклар жамоаси масхара қилмасдан қабул қилади ва унинг малакаси бутун сериал давомида ҳеч қачон сўроқ остига олинмайди — на раҳбарият, на ҳамкасблар, ҳатто у билан музокара олиб борадиган тажрибали жиноятчилар ҳам.
Иккинчидан, у бу касбда муваффақият қозонган ягона одам эмас. Унинг энг яқин дугонаси ажралиш ишлари бўйича таниқли адвокат. Унинг мижозлари асосан аёллардир. Кенан ишлайдиган йирик телеканал эгаси ҳам аёл.
Лейла яхши пул топади, сўнгги услубда кийинади, машина ҳайдайди ва ресторанда эркаклар компаниясига қарши етарли далиллари бўлмаса ҳам, телебошловчини мардларча ҳимоя қилади. Оиласини ҳурмат қилса ҳам, қаҳрамон кўп масалаларда ўз позициясига эга. У маст ҳолда бир қизни уриб юборган укасини аяб ўтирмай, қамайди. У бепарво ўғлини ҳимоя қилган онаси билан зиддиятга боради. Отасини ҳурмат қилиш билан бирга у отаси бўлгани учун унинг ҳамма айтганларига рози бўлавермайди.
Оилавий муносабатлардан ташқари, сериалда яна бир асосий қаҳрамон ҳақида ҳикоя қилинади. Кўплаб хайрия жамғармаларига асос солган машҳур филантроп ўлдирилади. Видолашув маросимида унинг қизи сўз олади. Ўзининг қўрқуви ва укаларининг қаршилигини енгиб, у узоқ вақтдан бери уни қийнаган нарсани айтади: отаси зўравон бўлган, у ўз мавқейидан фойдаланган ҳолда болалар ва аёлларни зўрлаган. Унинг нутқи оммавий ахборот воситалари томонидан эфирга узатилади. Бу жамоатчилик норозилигига олиб келади ва ўнлаб аёллар ҳаётида учраган зўравонлик ҳақида гапириш учун телевидение ва прокуратурага қўнғироқ қилишга қарор қилишади.
Сериалда аёл мавзуси ҳам оналик билан боғлиқ ҳолда қизиқарли тарзда очилади. Кенанни асраб олган отаси уни нима учун фарзандликка олишга қарор қилганликларини сўзлаб берганида шундай дейди: “Аёлни фақат она бўлгани учун севишадими? Фақат бола туға оладиган аёлларни яхши кўришадими? Аёлни аёл бўлгани учун севиш керак — самимий ҳолда. Ҳақиқий эркаккина аёлини хазинага айлантира олади”.
Кенаннинг отаси ўғли билан гаплашиб, унга асраб олиниш тарихини айтиб берар экан, шундай дейди: “Мендан жаҳлинг чиқиши мумкин, умуман олганда, ҳар қандай ҳис-туйғуларга эга бўлиш ҳуқуқига эгасан”. Замонавий психологияга тўлиқ мос келадиган позиция: бола барча ҳис-туйғуларга “рухсат берилганини”, ғазаб ва қайғуни ҳис қилиш одатий ҳол эканлигини билиши керак. Энг муҳими, бу ҳис-туйғулар билан нима қилиш, уларни қандай амалга оширишдир. Бу ҳақда эркак кишига гапириши икки баравар қимматлидир.
“Мутлақо бошқача” сериалида замонавий тарзда муҳокама қилинадиган яна бир муҳим мавзу бу — фарзандликка олиш сирига муносабатдир
Бир пайтлар Кенаннинг ота-онаси фарзандининг меҳрибонлик уйидан эканлигини “унутишга” қарор қилишади. Аммо ўтмиш болани қийнай бошлаганда, ота-онасининг бошқа иложи қолмайди. Кенанга ўзининг бўлиниб кетган шахсини даволашни бошлаш учун унга ҳақиқатни айтиш керак. “Унга буни билдирмай яширинча даволаш мумкинми?” дея савол беради она. “Бу мумкин эмас, фақат ҳақиқатгина уни қутқаради”, дейди психиатр. Асраб олинганлик ҳақидаги сир ҳимоя қилишдан кўра кўпроқ азоб беради. “Мен ўзимни доира ичида айланиб юргандек, болалигимнинг бир қисмини йўқотгандек ҳис қиляпман. Бу жуда оғир, дада”, — дейди Кенан ўтмишни билиш нега муҳимлиги ҳақида. “Ичимда нимадир борга ўхшайди, гўё мени нимадир таъқиб қилаётгандек. Менинг ҳақиқий ота-онам кимлар — ўғриларми ёки яхши инсонлар?”
Ҳар қандай одам ўзини ўтмиш орқали, шу жумладан, оиласи орқали билиши муҳимдир. Илдизларини билиш улар “муваффақиятсиз” ва травматик бўлса ҳам, билмасликдан кўра фойдалироқдир.
Психиатрик даволанишдан қўрқмасдан, жиддий ҳолатларда даволанишнинг муқаррарлигини қабул қилиш энг тўғри йўлдир. Маняклар иштирок этган триллерлар учун одатий “бўлинган шахсият” ташхиси — дисассоциатив бузилиш — бу психиатрияга жиддий фан сифатида қараш лозимлигига ишорадир.
Умуман олганда, турк сериалларида ҳаммаси оддий эмас. Ва ҳатто энг оддий мелодрамаларда ҳам, улар ҳайратланарли даражада илғор нарсаларни фильм воқеаларига олиб киришади ва жиддий мавзуларга тегиб ўтишади.
Изоҳ (0)