Сирдарё вилоятининг Гулистон шаҳрида яшовчи аёл эри томонидан аёвсиз калтаклангани, сочи калга олингани ҳақида хабар берилганди. Суд ҳукми билан айбдор эркак 2 йил 6 ойга озодликдан маҳрум қилинди.
Маълум қилинишича, фуқаро Қ.Б. Н.Э. (аёл)нинг никоҳи 2021 йилда бекор қилинган бўлса-да, аёл эрининг таклифига биноан 5 нафар фарзанди билан Гулистон шаҳридаги хонадонларнинг бирида истиқомат қилган. Шу вақтда эркак шаръий никоҳ асосида бошқа аёлга уйланган ва уни ҳам хонадонига олиб келган.
Эркак маст ҳолатда телефон орқали бегона эркаклар билан ёзишганини важ қилиб, аёлга ҳам руҳий, ҳам жисмоний тазйиқ ўтказган.
“Дарё” билан мулоқотда бўлган аёлнинг таниши эркак мактабда жисмоний тарбия ўқитувчиси бўлиб ишлашини, аёлини анчадан бери шу тарзда калтаклаб келишини билдирганди.
“Аммо ҳеч қаерга шикоят қилмайди. Менинг уйимга қочиб келган куни ҳам уч кун давомида боғлаб қўйилганини, оғзи скотч билан ўралган ҳолда уч кун оч қолганини, тўртинчи куни амаллаб уйдан қочиб чиққанини айтди”, деганди суҳбатдош.
Ҳолат юзасидан суд иши жиноят ишлари бўйича Гулистон шаҳар судида кўриб чиқилди. Суд ҳукмига кўра, эркак Жиноят кодексининг 126 (кўп хотинли бўлиш) ва 126-1 (оилавий (маиший) зўравонлик) моддаларида назарда тутилган жиноятларни содир этганликда айбдор деб топилган ва унга нисбатан 2 йил 6 ой муддатга озодликдан маҳрум қилиш жазоси тайинланди.
Изоҳ (0)