“Дарё”да Сирдарё вилоятининг Гулистон шаҳрида яшовчи Нилуфар исмли аёл эри томонидан аёвсиз калтаклангани, сочи калга олингани хабар берилганди.
Сирдарё вилоят ИИБ ахборот хизматининг “Дарё”га билдиришича, эркакка нисбатан жиноят иши қўзғатилган.
Жорий йилнинг 21 август куни Гулистон шаҳар навбатчилик қисмига келиб тушган хабар юзасидан Сирдарё вилояти Ички ишлар бошқармаси масъул ходимлари томонидан олиб борилган терговга қадар текширув ҳаракатларига кўра, Гулистон шаҳрида яшовчи фуқаро Қ.Б турмуш ўртоғи фуқаро Н.Э (аёл) билан рашк оқибатида ўзаро жанжаллашиб қолган. Натижада эркак хотини танасининг турли жойларига уриб, тан жароҳати етказган. Сочларини олиб ташлаган, — дейди вилоят ИИБ ахборот хизмати берган маълумотда.
Билдирилишича, мазкур ҳолат юзасидан фуқаро Қ.Б. га нисбатан Жиноят кодексининг 126-1-моддаси 1-қисми 4-банди (жиноят содир этилаётган пайтда ҳаёт учун хавфли бўлмаган ва ушбу модданинг олтинчи қисмида назарда тутилган оқибатларга олиб келмаган, лекин соғлиқнинг узоқ вақт, яъни камида йигирма бир кун, аммо тўрт ойдан кўп бўлмаган даврда ёмонлашувига ёки умумий меҳнат қобилиятининг ўн фоизидан ўттиз уч фоизигача йўқолишига сабаб бўлган қасддан баданга ўртача оғир шикаст етказиш) билан жиноят иши қўзғатилган. Гулистон шаҳар ИИБ ҳузуридаги Тергов бўлими томонидан тергов ҳаракатлари олиб борилмоқда.
“Дарё” билан мулоқотда бўлган аёлнинг танишига кўра, эридан аёвсиз калтак еган Нилуфар аҳволи абгор ҳолда 20 август куни ярим тунда унинг уйига келган.
Эри қайсидир мактабда жисмоний тарбия ўқитувчиси бўлиб ишлайди. Нилуфар анчадан бери шу тарзда калтакланиб келади.
Аммо ҳеч қаерга шикоят қилмайди. Менинг уйимга қочиб келган куни ҳам уч кун давомида боғлаб қўйилганини, оғзи скотч билан ўралган ҳолда уч кун оч қолганини, тўртинчи куни амаллаб уйдан қочиб чиққанини айтди, деганди суҳбатдош.
Изоҳ (0)