Ўзбекистонда маърифий фаолиятни амалга ошириш тартиби белгиланди, деб хабар бермоқда Адлия вазирлиги.
Унга кўра, ҳукумат қарори билан “Маърифий фаолиятни амалга ошириш тартиби тўғрисида”ги низом тасдиқланди. Низом маърифий фаолиятни амалга ошириш тартиби ва шаклларини белгилайди ҳамда қуйидагиларни назарда тутади:
- маърифий фаолиятни амалга оширишнинг ташкилий-ҳуқуқий шакллари ҳамда ушбу фаолиятни амалга оширувчиларга нисбатан қўйиладиган талаблар;
- маърифий фаолиятни амалга ошириш шакллари (маъруза, тақдимот, семинар, маҳорат дарси, курс, лексия, марафон, давра суҳбатлари ҳамда қонунчиликда тақиқланмаган бошқа шаклларда, бевосита ёки онлайн, якка тартибда ёки гуруҳларда, пулли ёки бепул);
- маърифий фаолиятни амалга ошириш тартиби, шу жумладан, ушбу фаолият тингловчилари орасида вояга етмаган шахс мавжуд бўлса, мажбурий тартибда маърифий фаолият дастурини ишлаб чиқиш талаби;
- маърифий фаолият иштирокчиларининг ҳуқуқлари, мажбуриятлари ва маърифий фаолиятни амалга оширишда тақиқланадиган хатти-ҳаракатлар.
Келтирилишича, маърифий фаолият билан юридик шахс ташкил этиб ёки якка тартибдаги тадбиркор сифатида рўйхатдан ўтиб шуғулланиш мумкин. Маърифий фаолият билан ёзма ёки электрон шаклда тузиладиган шартномага мувофиқ пулли асосда шуғулланилади.
14 ёшдан кичик шахсларнинг маърифий фаолият тадбирларида тингловчи сифатида иштирок этишларига уларнинг ота-онаси (қонуний вакиллари) ёзма розилиги билан йўл қўйилади.
Маълумот учун, маърифий фаолият – инсонни шахсий, интеллектуал ва маънавий ривожлантириш, ижтимоий ва иқтисодий фаоллигини ошириш, интеллектуал ва ижодий салоҳиятини намоён этиш, индивидуал салоҳияти, имкониятлари, коммуникатив қобилиятларини яхшилаш учун зарур кўникма ва малакани шакллантиришга қаратилган ҳамда давлат таълим стандартлари билан қамраб олинмайдиган фаолият тури ҳисобланди.
Аввалроқ эксперт Саидаброр Умаров айрим чала мотиватор ва психологлар оилаларнинг ажралишига сабаб бўлаётгани ҳақида гапирганди.
Чала мотиватор ва психологлар орасида ўз шахсий ҳаёти мисолида одамларга йўл-йўриқ кўрсатишга уриниш ҳолатлари кўпайиб келди. Шахсий ҳаёт ўз номи билан шахсий, уни оммага мослаштириб бўлмайди. “Мана мен биринчи эримдан ажрашганимда бундай қилган эдим, кейин иккинчи марта оила қурдим”, дея аёлларга ақл ўргатадиганлар кўпайиб кетди. Тўғри, қайта оила қуриш айб эмас, қонуний ва шаръий никоҳи бўлса, бемалол яшайверсин. Аммо бир оиласини сақлолмаган, муқим бахтли ҳаёт кечиролмаган инсоннинг бошқаларга бу борада маслаҳат беришида бирор мантиқ йўқ. Бу худди камбағал одамнинг сени бой қиламан, дейишига ўхшайди, дейди Саидаброр Умаров.
Изоҳ (0)