Олий Мажлис Сенатининг 55-ялпи мажлисида “Болаларни зўравонликнинг барча шаклларидан ҳимоя қилиш тўғрисида”ги қонуни муҳокамасида Сенат раиси Танзила Норбоева зўравонлик қилган шахс билан ҳеч ким ишламаётганини айтиб ўтди.
Ҳимоя ордери жорий қилинди, бир йилгача чўзиб берилди. Зўравонликка учраган аёлларга ҳам тиббий ёрдам кўрсатилади, касбга ўқитилади, ишга жойланади, у билан психологик ишлайди, ижтимоий ходим ишлайди, лекин зўравонлик қилган шахс билан ҳеч ким ишламайди. У ё ичкиликка берилган бўлади, ё саломатлигида муаммоси бор одам бўлади. Шунинг учун у билан ҳеч ким ишламайди. Аёл билан ишланади, лекин у билан ҳеч ким ишламайди.
Ҳимоя ордерининг муддати тамом бўлгандан кейин аёл яна ўша зўравоннинг уйига киритиб қўйилади ва бу иш яна давом этаверади. Шунинг учун бунинг илдизи билан ишлаш керак деган масалага эътиборни кучайтириш керак бўлади.
Бу қонунни ҳозир қабул қилганимиз билан, масалан, болалар зўравонлиги сабабли икки мингдан зиёд шахс ота-оналик ҳуқуқидан маҳрум қилинди. Бу бежиз эмас. Агар тузатиш дастурларини самарали йўлга қўймасак, ота-оналар ҳуқуқидан маҳрум қилиниш ҳолати ёки аёлларнинг бора-бора ўз жонига қасд қилиш ҳолатига ҳам олиб келиши мумкин. Қачонки, биз шу ишни йўлга қўймас эканмиз, зўравонлик ҳолатлари давом этаверади, деди Танзила Норбоева
Сенат раисининг қўшимча қилишича, бу тизим бўйича прокуратура, Ички ишлар вазирлигида ходимларни ўқитиш, қайта тайёрлаш учун ўқув муассасаларида қисқа муддатли курслар ташкил қилиниши керак.
Маълумот учун, охирги уч йилда икки минг нафардан зиёд шахс ота-оналик ҳуқуқидан маҳрум қилинган
Ялпи мажлисда сенаторлар “Болаларни зўравонликнинг барча шаклларидан ҳимоя қилиш тўғрисида”ги қонунини маъқуллади. Унга кўра:
- болаларни зўравонликнинг барча шаклларидан ҳимоя қилиш соҳасидаги муносабатлар ҳуқуқий тартибга солинади;
- зўравонликдан жабрланган шахс ариза билан тегишли органларга ёки судга мурожаат қилиши, бепул ҳуқуқий, иқтисодий, ижтимоий, психологик, тиббий ва бошқа ёрдам олиши мумкин бўлади;
- зўравонликдан жабрланган болаларга ҳимоя ордери берилади;
- зўравонликдан жабрланувчи ва ўзига нисбатан зўравонлик хавфи остида бўлган болалар аниқланиб, уларнинг ҳисоби юритилади.
Изоҳ (0)