Ижтимоий тармоқларда ноодатий усулда расм чизиши билан омма эътиборига тушаётган Шоҳруҳ Суюнов “Дарё”га берган интервьюсида ота-онаси рассом бўлишига қарши бўлгани ва соҳадаги қийинчиликлар ҳақида гапирди.
“Тиббиёт коллежига ўқишга киролмаганман”
— Мен Навоий вилоятидаги оддий оилада дунёга келганман. Дадам ўқитувчи, онам эса уй бекаси бўлган. Беш ёшимда математика дафтарига қизил ручка билан шифокорнинг расмини чизганман. Дадам шундан кейин рассомчиликка қизиқишимни пайқаб, қишлоғимиздаги расм тўгарагига олиб борган. Ундан кейин рассомчиликка ихтисослаштирилган санъат мактабида таҳсил олдим. Аммо оиламиздагилар бир саволни кўндаланг қўйди. “Бу касб билан оила боқиб бўлмайди, бошқа иш қилганинг маъқул”, деган гапни бир неча марта айтишди. Шу боис мактабни тамомлаб тиббиёт коллежига ўқишга топширдим. Аммо ўқишга киролмаганман ва тушкунликка тушганман. Ҳозир эса яхшиямки ўқишга киролмаганим, бўлмаса севимли ишим билан шуғуллана олмасдим, деб ўйлайман.
“Учинчи уринишда институтга қабул қилиндим”
— Санъат коллежида ўқиб юрган пайтим энг истеъдодли ўқувчи бўлганман. Шу боисдан Тошкентга келиб, илк уринишдаёқ ўқишга киришимга ишонардим. Аммо ўйлаганимдек бўлмади, икки уринишда ҳам имтиҳондан йиқилдим. Чунки Камолиддин Беҳзод номидаги миллий рассомлик ва дизайн институтига республикамиздан энг иқтидорли ўқувчилар келади. Орада карантин бошланди, аммо июнда бу йил ўқишга кираман деб яна Тошкентга йўл олдим. Имтиҳонларга жиддий тайёрланиб, ўша йили учинчи уринишда талабаликка қабул қилиндим.
“Блогерларни чизганимдан афсусланаман”
— Ўзгача йўналишда ижод қилишга ҳаракат қиламан. Бу йўналиш билан Ўзбекистонда ҳеч ким ижод қилмайди ва бу бўйича махсус курслар ҳам йўқ. Танлайдиган қаҳрамонимни яхшилаб ўрганаман, одамларнинг ҳам у ҳақидаги фикрларини инобатга оламан.
Расмни фалон вақтда тугатаман, деб олдиндан айтолмайман. Баъзи расмлар 13-14 соатда, баъзилари эса тўрт соатда чизилган. Аммо ҳар бир расмни чизишдан аввал бир-икки кун яхшилаб ўйлайман, ундан кейингина қўлимга қалам оламан.
Баъзи инсонларни, хусусан, блогерларнинг суратини чизганимдан афсусланган вақтларим ҳам бўлган. Чунки ҳар бир расм катта меҳнат ва вақт талаб этади. Аммо ўша инсон қилган меҳнатимни эътироф этмаса, киши бир оз ранжийди. Тўғри, у эътироф этиши учун ижод қилмаймиз, аммо бу барибир ёқимли ҳолат.
Масалан, олма ейиш чоғида Ҳабиб Нурмугаммедовнинг расмини соялар асосида яратганман. Уни туркиялик машҳур ошпаз эътироф этган ва Instagram’га жойлаган видеомни миллионлаб инсонлар томоша қилган.
“Тасвирий санъатга ҳам эътибор берилишини истайман”
— Тор доирада ижод қилишни истамайман. Ўзбек рассомларининг фаолиятини дунё кўришини хоҳлайман. Шу боис фақат ўзбек санъаткорлари ёки спортчилари билан чекланиб қолмай, дунё таниган машҳур инсонларнинг ҳам портретини яратяпман. Масалан, “Қашқирлар макони” сериали қаҳрамонларининг суратини чизганимда уни турк ва озарбайжонлик кино мухлислари ҳам эътироф этишди. Бу видео 6 миллиондан ортиқ томоша қилинди.
Юртимизда спортни ривожлантиришга катта эътибор берилади. Албатта бу яхши. Эътибор ва эътироф спортчиларни руҳлантиради ва янада шиддат билан шуғулланишга ундайди. Кузатаётган бўлсангиз, уларга ота-оналар ҳам ҳавас қилиб, болаларини спорт тўгаракларига беришмоқда. Тасвирий санъатга ҳам шундай эътибор беришларини истайман. Чунки Ўзбекистонда ҳам жаҳонга мақтана оладиган рассомлар жуда кўп, — дейди Шоҳруҳ Суюнов.
Видеони тўлиқ ҳолда қуйида томоша қилинг.
Изоҳ (0)