Ижтимоий тармоқларда тезликни ошириш қоидабузарлиги (радар) учун жарима миқдори оширилгани ҳақида хабарлар тарқалмоқда. “Дарё” мазкур хабарлар юзасидан ИИББ ахборот хизмати билан боғланди.
Бошқарма берган маълумотга кўра, ушбу маълумотлар ҳақиқатга тўғри келмайди. Бу турдаги қоидабузарлик жарималари оширилмаган. Ахборот тарқатишда расмий манбаларга асосланишни тавсия этамиз, дея қўшимча қилинган.
Янги қонун билан тезлик учун жарима миқдорлари оширилгани йўқ. Ҳозирда белгиланган тезликдан 20 гача оширилса — 1 баравар, 40 гача оширилса — 5 баравар, 40 дан оширилса — 9 баравар миқдорида жарима тўланади.
Бундан аввал Ўзбекистонда жарима баллари 12 баллдан ошган ҳайдовчилар транспорт воситасини бошқариш ҳуқуқидан маҳрум қилиниши белгилангани ҳақида хабар берилган эди.
Ҳайдовчилар учун жарима баллари тизими
Ўзбекистонда ҳайдовчилар ҳуқуқбузарликлари учун жарима баллари тизими жорий этилиши ҳақида 2022 йилнинг февралида ўтказилган видеоселектор йиғилишида маълум қилинганди. Ўша йилнинг апрелида “Автомобиль йўлларида инсон хавфсизлигини ишончли таъминлаш ва ўлим ҳолатларини кескин камайтириш чора-тадбирлари тўғрисида”ги президент қарори қабул қилинди. Унда ҳар бир йўл ҳаракати қоидабузарлиги учун 12 ой давомида алоҳида жарима баллари ҳисоблаб борилиши белгиланди.
Мазкур тизим 2022 йил 1 декабрда ишга тушиши керак эди. ЙҲХХ бу тизим кўзда тутилган санадан бошлаб тест режимида ишга тушурилишини, дастурий таъминот синовдан ўтказилиб, аниқланган хато ва камчиликлар тўлиқ бартараф этилгандан кейин ишга туширилиб, ҳайдовчилар томонидан содир этилган қоидабузарликлар учун жарима баллари ҳисобланишини билдирганди. Ўшанда Вазирлар Маҳкамаси қарор лойиҳаси ишлаб чиқилгани, Олий Мажлис қонунчилик палатасининг масъул ходимлари билан ҳамкорликда ишчи гуруҳ тузилган ҳолда қонун лойиҳасини қайта такомиллаштириш ишлари олиб борилаётгани маълум қилинганди.
Қонунчилик палатаси жарима баллари кўзда тутилган қонунни 2023 йил 28 ноябрда қабул қилди. Сенатда биринчи марта 2024 йил 16 августда куни кўриб чиқилиб, уни такомиллаштириш ва якунлаш учун Сенат ва Қонунчилик палатасининг келишув комиссиясига қайтарилди. 2025 йил 24 январда қонун қайта кўриб чиқилиб, маъқулланди.
Изоҳ (0)