Вашингтонда American Airlines самолёти ва ҳарбий вертолётнинг ҳавода тўқнашуви оқибатида ҳалок бўлган барча 67 кишининг жасадлари топилиб, дарёдан олиб чиқилди. Бир нафар шахсдан ташқари барча ҳалок бўлганларнинг шахси аниқланган.
Жорий йилнинг 29 январь куни кечқурун АҚШ пойтахти осмонида Black Hawk ҳарбий вертолёти қўнишга келаётган PSA Airlines (American Airlines) йўловчи самолёти билан тўқнашди. Ҳалокат оқибатида иккала ҳаво кемаси ҳам Потомак дарёсига қулаб тушди. Самолёт бортида 60 нафар йўловчи ва 4 нафар экипаж аъзоси, вертолётда эса уч нафар ҳарбий хизматчи бўлган. Лайнер ва вертолёт бортида бўлганларнинг бирортаси ҳам тирик қолмаган.
Транспорт хавфсизлиги бўйича миллий кенгаш (NTSB) вертолётни 61 метрлик парвоз чегарасидан ташқарига олиб чиқиши мумкин бўлган янги маълумотларни ўрганаётганини маълум қилди. NTSB хабар беришича, аэропортнинг радар сенсорлари ва бошқа маълумотларга асосланган ҳаво ҳаракатини бошқариш мониторида вертолёт 91 метр баландликда кўрсатилган.
Терговчилар маълумотларни текшириш учун ҳали ҳам сув остида бўлган вертолёт ҳақида кўпроқ маълумот олишлари кераклигини айтишди.
Самолётнинг қора қутиси унинг баландлигини 99 метр деб кўрсатган, бунда 7,6 метрлик хатолик эҳтимоли мавжуд.
Мураккаб об-ҳаво шароитида ишлаётган гуруҳлар Потомак дарё остидан самолётнинг бир нечта йирик қисмларини, жумладан, ўнг қанот, фюзеляжнинг марказий қисми ва олд кабинанинг бир қисмини, дум қоплама бўлакларини ва йўналиш рулини олиб чиқишга муваффақ бўлди .
Биз ушбу фожиали йўқотишни бошдан кечираётган қурбонларнинг оила аъзолари билан қалбан биргамиз, дейилади қидирув ишларида иштирок этаётган шаҳар ва федерал идораларнинг қўшма баёнотида.
Расмийлар аввалроқ барча ҳалок бўлганларнинг жасадларини топишга умид қилишаётганини маълум қилишганди. Энди улар самолёт бўлакларини сувдан чиқаришга эътибор қаратмоқда ва шу ҳафта охирида вертолётни тўлиқ олиб чиқишга умид қилмоқда.
Изоҳ (0)