Shavkat Mirziyoyev 11-fevral kuni o‘tkazilgan videoselektor yig‘ilishida haydovchilar huquqbuzarliklari uchun jarima ballari tizimi joriy etilishini ma’lum qildi. Bu haqda prezident matbuot kotibi Sherzod Asadov xabar berdi.
“Masalan, haydovchi tezlikni oshirsa – 1 ball, qizil chiroqda o‘tsa – 3 ball hisoblanadi. Agar bir yilda qoidabuzarliklar jami 12 balldan oshsa, haydovchi avtomobil boshqarish huquqidan mahrum bo‘ladi”, — degan davlat rahbari.
Bundan tashqari, avtomobilni tartibsiz boshqarib, boshqa haydovchilarga xalaqit qilganlik uchun alohida yo‘l bezoriligi degan yangi javobgarlik turi kiritiladi.
Yig‘ilishda, shunindek, haydovchilarning javobgarligini majburiy sug‘urta qilishda to‘lanadigan sug‘urta badalini jarima ballaridan kelib chiqib belgilash tartibi joriy etilishi ham belgilangan.
Shu bilan birga, yo‘l harakati qoidalari ancha eskirgani, xalqaro standartlar asosida yangidan ishlab chiqilishi shartligi ko‘rsatib o‘tilgan.
“Qonunchilikka kiritiladigan hamma yangiliklar deputatlar, ekspertlar va jamoatchilik bilan bamaslahat ishlab chiqiladi”, — degan prezident.
So‘nggi paytlarda yo‘l harakati xavfsizligi inspektori faoliyatiga qarshilik ko‘rsatish, ularni obro‘sizlantirish holatlari ko‘payayotgani sababli qonunlarni ko‘rib chiqishda bu masalaga ham alohida e’tibor qaratish zarurligi ta’kidlangan.
Izoh (0)