Бухоро вилоятида бешта махсус радар мосламаси билан жиҳозланган автомобиль фаолият кўрсата бошлади, дея хабар берди «Дарё» мухбири.
Вилоят ЙҲХБ инспекторларига бириктирилган, онлайн режимда ишловчи махсус радар мосламали автомобиллар бир йўналишда ва қарама-қарши йўналишда ҳаракатланиб келаётган, белгиланган тезликка амал қилмаган автомобилларни қайд этади.
«Ушбу автомобиллардаги радарлар кеча-ю кундуз онлайн тарзда ишлайди. Юрган ҳолатда транспорт воситаларининг қоидабузарлигини аниқлаб беришга мослаштирилган ҳаракатдаги бундай воситалар вилоятнинг бешта йирик йўналишли йўлларида, жумладан, Бухоро шаҳар йўналиши, Когон шаҳар ва Когон туманини ўз ичига олган Қоровулбозор—Бухоро йўналиши, Жондор—Қоракўл—Олот йўналиши, Бухоро туман—Ромитан—Пешкў йўналиши, Вобкент—Ғиждувон—Шофиркон йўналишларида хизматга жалб этилди. Мазкур мултирадарлар кўчма ва қўзғалмас радарларга нописанд қарайдиган ва айнан қоидабузарликни ўзи учун шиор билган учар ҳайдовчиларнинг ҳам хатти-ҳаракатларига чек қўяди. Шунингдек, оғир турдаги автоаварияларнинг олдини олишда ҳам хизмат қилади», — дейди Улуғбек Шукруллаев.Матбуот хизмати раҳбари сўзига кўра, бугунги кунда вилоятда 228 мингдан ортиқ транспорт воситаси ҳаракатланади. 2022 йилнинг ўтган даврида тезлик ошириш билан боғлиқ 20 мингдан ортиқ қоидабузарлик ҳолати қайд этилган. Шулардан 1800 га яқин ҳолатда ҳайдовчиларнинг спиртли ичимлик истеъмол қилган ҳолда транспорт воситасини бошқаргани рўйхатлаштирилган. Қоидабузарлик даражасига қараб жарималар ундирилган.
«Тезликни ошириш билан боғлиқ қоидабузарликлар орқали ҳайдовчилардан қанча миқдорда жарима ундирилгани махфий саналади ва бу рақамларни ошкор эта олмайман», — деди Улуғбек Шукруллаев.
Изоҳ (0)