Тошкент шаҳрининг баъзи кўчаларида интеллектуал камералар автобус йўлакларига тўхтаган автомобилларга жарима ёзишни бошлади, деб хабар беради “Тошшаҳартрансхизмат” матбуот хизмати.
Қайд этилишича, октябрь—ноябрь ойларида Ички ишлар вазирлиги “Хавфсиз шаҳар” маркази, Тошкент шаҳар йўл ҳаракати хавфсизлиги хизмати, Идоралараро тезкор штаби ҳамда “Тошшаҳартрансхизмат” АЖ мутахассислари билан ҳамкорликда, Тошкент шаҳридаги тирбандлик юқори бўлган кўчалар, автобуслар ҳаракати учун ажратилган махсус “А” йўлакларга тўхташ ва тўхтаб туриш қоидабузарликларини аниқловчи интеллектуал видеокузатув камераларидан 30 таси объектларда ўрнатилган.
Ҳозирда мазкур 30 та интеллектуал видеокузатув камераларининг Амир Темур ва Алишер Навоий кўчаларига ўрнатилганларидан 5 таси тўлиқ ишга туширилди.
2023 йил 24 декабрь куни мазкур кўчаларда тўхташ ва тўхтаб туриш қоидаларини бузган 175 та транспорт воситалари ҳайдовчиларига нисбатан, белгиланган тартибда Маъмурий жавобгарлик тўғрисидаги кодекснинг 128/6-моддасига асосан, БҲМнинг икки баробари — 680 минг сўм миқдорида жарима белгиланган.
Аукцион орқали радар
Тадбиркорларга 2021 йилнинг 1 мартидан бошлаб йўлларга камералар ва радарлар ўрнатишга рухсат берилган. Ер участкалари онлайн аукционлар орқали тақдим этилади.
Аукцион ғолиблари участкаларни бошқа тадбиркорларга ўтказиш ҳуқуқи билан чекланмаган муддатга олади. 2021—2022 йилларда шу тарзда 3356 та видеокамера ва 763 та радар ўрнатилган. Маълумот учун, 2021 йил июнь ойидан бошлаб Ўзбекистондаги чорраҳа ҳамда йўлларда радар ва камералар қўйиш жойлари аукцион орқали савдога қўйилиши бошланганди. 1 июль куни E-auksion сайтида биринчи бор Тошкент шаҳрида радар ўрнатиладиган жойлар аукционга чиқарилган.
Изоҳ (0)