Вазирлар Маҳкамасининг “Йўл ҳаракати хавфсизлигини таъминлаш соҳасига хусусий секторни жалб этишга доир қўшимча чора-тадбирлар тўғрисида” қарорига ўзгартириш ва қўшимчалар киритилди, деб хабар беради ЎзА.
Жумладан, тадбиркорлик субъектлари томонидан автомобиль йўлларида йўл ҳаракати қоидалари бузилганини махсус автоматлаштирилган фото ва видео қайд этиш дастурий-техник воситаларини ўрнатиш ва ишга тушириш муддатини 60 кундан 180 кунга узайтирилади.
Дастурий-техник воситалар “Маъмурий амалиёт” комплекс автоматлаштирилган ахборот тизимига интеграция қилингандан сўнг уларни ўн кун давомида синов тариқасида ишлатиш тизими йўлга қўйилади.
Йўл ҳаракати қоидабузарликларидан ундирилган жарима суммаси тақсимланишида тадбиркорлик субъектларига берилган имтиёзли давр 1 йилдан 2 йилга узайтирилади.
Тадбиркорлик аукцион савдосида ғолиб бўлганлиги тўғрисидаги билдиришномани олган кундан бошлаб 90 кун ичида объектда дастурий-техник воситаларни ўрнатиш билан боғлиқ бирор-бир ҳаракат (қурилиш-монтаж ишлари)ни амалга оширмаса, келишув суд орқали бекор қилинади.
Дастурий-техник воситалар орқали қайд этилган йўл ҳаракати қоидабузарлик ҳолатлари бўйича “Маъмурий амалиёт” комплекс автоматлаштирилган ахборот тизимига юборилган маълумотлардаги хатоликларнинг умумий сони беш ва ундан ортиқ фоизни ташкил этган тақдирда ҳам тадбиркорлик субъектининг объектга нисбатан бўлган мулк ҳуқуқи суд орқали бекор қилинади.
Аукцион орқали радар
Тадбиркорларга 2021 йилнинг 1 мартидан бошлаб йўлларга камералар ва радарлар ўрнатишга рухсат берилган. Ер участкалари онлайн аукционлар орқали тақдим этилади.
Аукцион ғолиблари участкаларни бошқа тадбиркорларга ўтказиш ҳуқуқи билан чекланмаган муддатга олади. 2021—2022 йилларда шу тарзда 3356 та видеокамера ва 763 та радар ўрнатилган. Маълумот учун, 2021 йил июнь ойидан бошлаб Ўзбекистондаги чорраҳа ва йўлларда радар ва камералар қўйиш жойлари аукцион орқали савдога қўйилиши бошланганди. 1 июль куни E-auksion сайтида биринчи бор Тошкент шаҳрида радар ўрнатиладиган жойлар аукционга чиқарилган.
Изоҳ (0)