Қозоғистондан Ўзбекистонга олиб келинаётган 43 вагон картошка чириди

Қозоғистоннинг Павлодар шаҳридан экспорт қилинган 43 та вагондаги картошка Ўзбекистон билан чегарада тўхтатилди. Сабзавотлар 10 кундан ортиқ вагонда қолиб кетгани сабабли музлаб, яроқсиз ҳолга келди. Бу ҳақда KTK хабар берди.

Қозоғистонлик тадбиркорлар январь ойида уни Ўзбекистонга сотган, юк Тошкент шаҳрига йўл олиши керак эди. Бироқ чегара постида у фитосанитар текширувдан ўтказиш учун тўхтатилган. Сабзавотлар 10 кундан ортиқ вагонда қолиб кетгани сабабли картошка музлаб, яроқсиз ҳолга келган.

Мана, чириди. Сув оқяпти, ҳаммаси оқиб кетди! Аввал музлади, кейин эриди, тамом вассалом. Бир вагонда 68 тонна бор. Аммо энди у яроқсиз!, деди тадбиркор Азамат Серикбаев.

Сотувчиларнинг айтишича, картошка ҳатто молларга беришга ҳам ярамайди. Улар юкни нима учун бу қадар узоқ ушлаб туришганини тушунмаяпти. Ҳужжатлар январь ойининг ўрталарида, экспортга тақиқ киритилишидан олдин расмийлаштирилган. Шу сабабли, тадбиркорлар юкни бунча узоқ ушлаб туришга ҳеч қандай асос йўқ деб ҳисобламоқда.

Ҳокимият биздан бу картошкани 100-150 тенгадан сотишни сўради. Ваҳоланки, ҳозир унинг нархи бир килограмми учун 300 тенгедан бошланади. Энди нима қилишни билмайман. Барча зарар энди менинг зиммамда. Мен уч вагондан 60 миллион тенге зарар кўрдим!, деди тадбиркор Нурсултон Орманов.

Қишлоқ хўжалиги вазирлиги таъкидлашича, сабзавот юкланган вагонлар тегишли текширувдан ўтган. 

Бугунги кунга келиб, менинг маълумотларимга кўра, текширув ишлари якунланди. Зарур маълумотлар аниқланди. Ҳозирда вагонларнинг кейинги ҳаракатланиши учун ҳеч қандай тўсиқ ва ғов мавжуд эмас. Шу боис, 43 та экспортга йўналтирилган вагон чегарани кесиб ўтиши мумкин, деб маълум қилди Қозоғистон Қишлоқ хўжалиги вазирининг ўринбосари Ербол Тасжуреков.

Зарар кўрган бешта компания вакиллари амалдорларни судга бериш ниятида.

Эслатиб ўтамиз, январь ойи ўрталарида Қозоғистон шаҳарларида картошка нархи кескин ошди — 455 тенгегача. Вазиятга жавобан ҳукумат маҳсулот экспортига вақтинчалик тақиқ қўйди ва савдо воситачилари билан ҳисоб-китоб қилишни бошлади.