Qozog‘istondan O‘zbekistonga olib kelinayotgan 43 vagon kartoshka chiridi

Qozog‘istonning Pavlodar shahridan eksport qilingan 43 ta vagondagi kartoshka O‘zbekiston bilan chegarada to‘xtatildi. Sabzavotlar 10 kundan ortiq vagonda qolib ketgani sababli muzlab, yaroqsiz holga keldi. Bu haqda KTK xabar berdi.

Qozog‘istonlik tadbirkorlar yanvar oyida uni O‘zbekistonga sotgan, yuk Toshkent shahriga yo‘l olishi kerak edi. Biroq chegara postida u fitosanitar tekshiruvdan o‘tkazish uchun to‘xtatilgan. Sabzavotlar 10 kundan ortiq vagonda qolib ketgani sababli kartoshka muzlab, yaroqsiz holga kelgan.

Mana, chiridi. Suv oqyapti, hammasi oqib ketdi! Avval muzladi, keyin eridi, tamom vassalom. Bir vagonda 68 tonna bor. Ammo endi u yaroqsiz!, dedi tadbirkor Azamat Serikbayev.

Sotuvchilarning aytishicha, kartoshka hatto mollarga berishga ham yaramaydi. Ular yukni nima uchun bu qadar uzoq ushlab turishganini tushunmayapti. Hujjatlar yanvar oyining o‘rtalarida, eksportga taqiq kiritilishidan oldin rasmiylashtirilgan. Shu sababli, tadbirkorlar yukni buncha uzoq ushlab turishga hech qanday asos yo‘q deb hisoblamoqda.

Hokimiyat bizdan bu kartoshkani 100-150 tengadan sotishni so‘radi. Vaholanki, hozir uning narxi bir kilogrammi uchun 300 tengedan boshlanadi. Endi nima qilishni bilmayman. Barcha zarar endi mening zimmamda. Men uch vagondan 60 million tenge zarar ko‘rdim!, dedi tadbirkor Nursulton Ormanov.

Qishloq xo‘jaligi vazirligi ta’kidlashicha, sabzavot yuklangan vagonlar tegishli tekshiruvdan o‘tgan. 

Bugungi kunga kelib, mening ma’lumotlarimga ko‘ra, tekshiruv ishlari yakunlandi. Zarur ma’lumotlar aniqlandi. Hozirda vagonlarning keyingi harakatlanishi uchun hech qanday to‘siq va g‘ov mavjud emas. Shu bois, 43 ta eksportga yo‘naltirilgan vagon chegarani kesib o‘tishi mumkin, deb ma’lum qildi Qozog‘iston Qishloq xo‘jaligi vazirining o‘rinbosari Yerbol Tasjurekov.

Zarar ko‘rgan beshta kompaniya vakillari amaldorlarni sudga berish niyatida.

Eslatib o‘tamiz, yanvar oyi o‘rtalarida Qozog‘iston shaharlarida kartoshka narxi keskin oshdi — 455 tengegacha. Vaziyatga javoban hukumat mahsulot eksportiga vaqtinchalik taqiq qo‘ydi va savdo vositachilari bilan hisob-kitob qilishni boshladi.