Фарғонада «Ёшлар дафтари»га киритилган 303 нафар ишсиз ёшга деҳқончилик учун ер берилди

Фарғона вилоятининг Учкўприк туманида «Ёшлар дафтари»га киритилган 45 нафар ишсиз ёшга деҳқончилик қилиш учун ер ажратиб берилди. Бу ҳақда «Дарё»га вилоят ҳокимлиги ахборот хизмати маълум қилди.

Қайд этилишича, шу кунга қадар маҳалла фуқаролар йиғинларининг тавсияси ва ишчи гуруҳ аъзоларининг «маҳаллабай» ўрганишлари асосида «Ёшлар дафтари»га киритилган ишсиз, мигрант, ногиронлиги бор ва ижтимоий кўмакка муҳтож 303 нафар ёшга деҳқончилик қилиш учун ер берилган.

Эндиликда бу йигит-қизлар оила аъзолари кўмагида деҳқончилик қилиб, йилда уч мартагача ҳосил олиш учун ишлайди.

«11 йилдан бери Россия ва Қозоғистонда ишлардим. Карантинда йўллар ёпилиб, ишга кета олмадим. Мана бир йилдан бери ишсиз эдим. Бугун маҳалладан чақиришиб, 20 сотихдан ер беришди. Бу ердан унумли фойдаланиб, картошка ва сабзавот маҳсулотлари етиштирмоқчиман. Бир йил давомида шу ерда меҳнат қилиб, уч марта ҳосил олиб, 25 миллион сўмдан ортиқ даромад олишни мўлжаллаб турибман», — деди Аббос Алимқулов.

Таъкидланишича, ишсиз ёшларнинг бандлигини таъминлаш, уларни молиявий қўллаб-қувватлаш, турмуш шароитини яхшилаш, қишлоқ жойларда янги иш ўринлари яратиш мақсадида 84 нафар ёшга 6 миллиард 835 миллион сўм имтиёзли кредит ажратилган.