Ижтимоий тармоқларда ўзбекистонлик шахматчи Нодирбек Якуббоев ҳиндистонлик шахматчи билан ўйин олдидан қўлини сиқиб қўймагани кўплаб муҳокамаларга сабаб бўлди.
Ҳодиса Тата Steel Challengers 2025 мусобақасининг 4-турида рўй берган. Одатга кўра, шахматчилар қўл сиқиб ўйинни бошлайди. Аммо ўзбекистонлик шахматчи Ваишалига қўл узатмади.
Кўплаб танқидларга сабаб бўлган ҳолат бўйича Якуббоевнинг ўзи тушунтириш бериб, бу унинг эътиқоди билан боғлиқлигини айтган.
“Бугун (26 январь куни) мен бу ҳақда Ирина Булмагага айтдим. У бунга рози бўлди. Аммо ўйин залига келганимда, ҳакамлар менга ҳеч бўлмаганда “Намасте” қилишим кераклигини айтишди. Дивя ва Ваишали билан ўйинларда мен уларга бу (эътиқодим) ҳақда ўйиндан олдин айта олмадим ва ноқулай ҳолат юзага келди.
Мен Ваишали ва унинг акаси қаторида барча ҳиндистонлик шахматчиларни ҳурмат қиламан. Агар бу ҳаракатим орқали уни ноқулай вазиятга қолдирган бўлсам, бунинг учун узр сўрашга тайёрман.
Мен ўзим тўғри деб билган ишни қиламан. Бу ҳаракатим орқали барча шундай қилиши керак деб ҳисобламайман, бу ҳамманинг ўзига ҳавола бўлган танловидир”, деди ўзбекистонлик шахматчи.
Маълумот учун, ушбу баҳсда ҳиндистонлик шахматчи ғалаба қозонган. Кеча, 26 январь куни Булмагага қарши учрашувда ғалаба қозонган Нодирбек Якуббоев 4 очко тўплаб турнир жадвалида 9-ўринда бормоқда.
Изоҳ (0)