Жаҳон шахмат федерацияси декабрь ойи якунлангач, ўз рейтингини янгилади. Ушбу янгиланган жаҳон рейтингида кучли 100 ликдан 5 нафар ўзбекистонлик гроссмейстер ўрин олди.
Рейтингда Нодирбек Абдусатторов (2768) 6-ўринда қайд этилди. У аввалги ойда ҳам шу ўринда қайд этилган эди. Бу ойда унинг рейтинг очколари 9 очкога камайган.
Бундан ташқари, Жавоҳир Синдоров (2692) 37-ўринга кўтарилди. У аввалги ойда 46-ўринда эди. Энг кучли шахматчилар рейтингида Рустам Қосимжонов (2683) ҳам ўрин олган. Тажрибали шахматчи 45-ўринда жойлашган. 2670 рейтинг очкосига эга шахматчи Шамсиддин Воҳидов 52-ўриндан жой олди. Аввалги ойда 62-ўринда қайд этилган Нодирбек Якуббоев (2659) бу ойда 67-ўринга тушиб кетди.
Бир неча ой ёшлар ўртасидаги рейтингда етакчилик қилган Нодирбек Абдусатторов бу йил 21 ёшга тўлиши муносабати билан ушбу рейтингдан чиқарилди. Кучли учликдан ўзбекистонлик Жавоҳир Синдоров олган. Яна бир ўзбекистонлик шахматчи Мухриддин Мадаминов 31-ўринда жойлашган. Муҳаммадзохид Суяров эса 68-ўринни эгаллаган.
Маълумот учун, Нью-Ёркда рапид ва блиц бўйича Жаҳон чемпионати ўтказилди. Рапид йўналишида 18 ёшли Володар Мурзин (2588) энг тажрибали рақибларини ортда қолдириб, жаҳон чемпионига айланди. Жавоҳир Синдоров 6-ўринни эгаллади. Нодирбек Абдусатторов кучли 30 ликдан ўрин олди.
Блиц бўйича мусобақада ўзбекистонлик спортчилар плей-офф чиқа олмай мусобақани эрта якунлади.
Изоҳ (0)