Лана Дел Рей, Билли Айлиш, Дуа Липа — бу хонандаларнинг исмларини бугун миллионлаб одамлар билади, аммо уларга дастлабки машҳурликни қўшиқлари эмас, айнан реклама олиб келган. Қуйида айнан шу ҳақда сўз юритамиз.
Лана Дел Рей — Jaguar ва H&М рекламаларида
Бугун Лана Дел Рей мусиқа саноатининг энг машҳур намоёндаларидан бири ҳисобланади. 2011 йилда унинг ижодий фаолияти эндигина бошланганди. Ўша йили у YouTube платформасига Video Games ва Blue Jeans номли ҳаваскор клипларини жойлаган— айнан шу клиплар унга илк мухлисларни олиб келган.
Орадан бор-йўғи бир йил ўтиб, 2012 йил сентябрь ойида Jaguar номли машҳур автомобиль бренди янги автомобилни тақдим этиш учун уни реклама кампаниясига таклиф қилади. Бунинг учун Лана Burning Desire номли қўшиқни ёзади ва айнан шу қўшиқ туфайли уни илк бор “поп мусиқа маликаси” деб аташади.
Худди шу йили у H&М брендининг куз-қиш коллекцияси юзи бўлади. Реклама ролигида Лананинг Blue Velvet қўшиғига қилган кавери янграйди, видеотасвир эса афсонавий режиссёр Девид Линчнинг шу номдаги фильмига ишора қилади. Айнан шу реклама туфайли қўшиқ яна бир бор машҳур бўлади, Лана эса миллионлаб мухлисларнинг эътирофига сазовор бўлади.
Феист (Лесли Файст) — Apple рекламасида
Лесли Файст Канададан ташқарида деярли танилмаган эди, аммо 2007 йилда у iPod Nano рекламаси фонида унинг “1234” композицияси янгради. Бу ролик туфайли хонанда 73 мингта юклаб олишга эришади ва Billboard Hot 100 чартида 28-ўринни эгаллайди.
Файст машҳурлиги глобал даражага етмаган бўлса-да, “1234” ва Тhе Remainder қўшиқлари Apple рекламалари орқали кўпчиликка таниш бўлиб қолди. Шунингдек, хонанда 2008 йилда Файст тўртта “Грeмми” мукофотига номзод қилиб кўрсатилган.
Билли Айлиш — Gucci ва Apple рекламасида
Билли Айлишнинг мусиқа карьераси рекламадаги иштирокидан анча олдин бошланган эди, аммо унинг ўзгача мусиқа услуби ва ўзини ўзгача усулда тақдим қила олмаслиги туфайли бутун дунёга машҳур эмасди. Apple ва Gucci рекламалари эса унга кенгроқ аудиторияга танилиш имконини берди. 2018 йилда у Cоmе Оut аd Play номли трекни чиқарди, бу қўшиқ махсус Apple’нинг Янги йил реклама кампанияси учун ёзилган эди. Реклама ҳар бир инсонда яширин истеъдод борлиги ва уни намоён қилиш учун журъат кераклигини кўрсатади. Бу ғоя Билли Айлишнинг шахсияти билан айнан мос келарди.
2021 йилга келиб, у аллақачон жаҳон миқёсида машҳур бўлганида, Apple уни яна бир лойиҳа учун таклиф қилади. Компания Билли Айлишнинг Getting Older ва Goldwing сингллари орқали ўзининг янги аудио функциясини тарғиб қилади.
2022 йилда эса ноодатий ташқи кўринишга эга бўлган Билли машҳур Gucci мода уйи билан ҳамкорлик қилади. 50 йиллар услубида ишланган атмосферавий рекламада Билли янги қуёшдан сақловчи кўзойнаклар коллекциясини реклама қилади. Қизиқ жиҳати шундаки, бу рекламада Билли Айлишнинг ҳеч бир қўшиғи ишлатилмаган, Gucci дунёга айнан унинг шахсини тақдим этишни истаган.
Дуа Липа — Puma ва Evian билан ҳамкорликлар
Бугун Дуа Липа гўзаллик ва мода тимсоли сифатида тан олинган санъаткор. Бу даражадаги эътирофга хонанда машҳур брендлар билан қилган реклама ҳамкорликлари орқали эришган.
2017 йилда британиялик хонанда Patrizia Pepe брендининг куз-қиш коллекциясини намойиш қилган. 2020 йилда эса у спорт бренди Puma’нинг юзи бўлиб, уларнинг She Moves Us номли аёллар кампаниясида асосий иштирокчига айланган.
Бундан ташқари, Дуа Липа икки марта Evian минерал сувининг рекламаларида суратга тушган. 2021 йилда Drink True ролигида унинг Levitating қўшиғи янграган. 2022 йилда эса у британиялик теннисчи Эмма Радукану билан биргаликда рекламада иштирок этган. Шу ва бошқа рекламалар орқали Дуа Липа мусиқадан ташқарида ҳам катта мухлислар базасига эга бўлган ва ҳозирда бутун дунёда мода трендларини белгилаб бермоқда.
Изоҳ (0)