Сурхондарёда ЙПХ ходимлари ва ҳайдовчи ўртасида жанжал содир бўлгани акс этган видео тарқалди. Ҳолат юзасидан вилоят ЙҲХБ маълумот берди.
Унга кўра, 21 май куни Музработ туманидаги маҳалла ҳудудида хизмат қилаётган ЙПХ ходимларидан бири ҳаракатланиш давомида шубҳа уйғотган Lacetti ҳайдовчисига тўхташ ишорасини кўрсатган.
Ҳайдовчи эса қонуний талабни бажармай қочиб кетган. Шу тарзда у яқин атрофда бўлган уйларнинг бирига кириб қолган. Ходимлар ундан бир неча маротаба ҳужжатларни сўраган бироқ у тақдим этишни хоҳламай, автомашинадан тушиб қочиб кетишга уринган.
Ходимлар ҳаракатига шу атрофда бўлган бир неча фуқаролар аралашган. Шу сабабли сафдор ходим электрошокердан фойдаланиб ҳайдовчини тинчлантиришга уринган. Навбатчилик қисмидан қўшимча ёрдам чақирилган.
Шундан сўнг ҳайдовчи ички ишлар бўлимига олиб келинган. Ҳайдовчи қилмишидан пушаймон эканини билдирган. Ҳозирда терговга қадар текширув ҳаракатлари олиб борилмоқда. Ходимлар ҳаракатлари юзасидан ҳам хизмат текшируви ўтказилмоқда.
Бундан аввал Бухоро вилоятининг Жондор туманида ҳайдовчи Cobalt’ни қасддан ЙПХ ходими устига ҳайдагани ҳақида хабар берилган эди. 19 январь куни Навоийда 16 ёшли бола отасининг машинасида ЙПХ ходимини уриб юбориб, унинг ўлимига сабабчи бўлганди.
Изоҳ (0)