Хоразм вилояти ИИБ ижтимоий тармоқларда тарқалган, ҳазорасплик фуқаролар ва ЙПХ ходимларини ҳақорат қилган эркак видеоси юзасидан маълумот берди.
Ижтимоий тармоқларда 17 май куни бир фуқаронинг Ҳазорасп туманида яшовчи фуқаролар ва ЙПХ инспекторларини ҳақорат қилгани тасвирланган видеолавҳа тарқалди. Хоразм вилояти ИИБ томонидан олиб борилган суриштирув ишлари натижасида ушбу фуқаронинг шахсига аниқлик киритилган.
“Юртдошларимизнинг ҳақли эътирозига сабаб бўлган ушбу шахснинг хатти-ҳаракатлари юзасидан терговга қадар текширув олиб борилмоқда”, — дейилади муносабатда.
Кўп ўтмай ижтимоий тармоқларда ушбу шахснинг узр сўраб чиққан видеоси ҳам тарқалди.
“Хоразмга айланишга борган вақтида ҳазораспликларни, шунингдек, маст ҳолатда ЙПХ ходимларини ҳақорат қилганим учун узр сўрайман”, — дейди у.
ЙПХ ходимлари билан боғлиқ жанжаллар
Бундан олдин Фарғонада жамоат тартибини бузиб, ИИБ ходимларини ҳақорат қилган маст фуқаро 15 суткага қамалганди. Навоийда ЙПХ ходимларини уриб, ҳақоратлаган “ҳимоячи” аёлга жазо тайинлангани, Тошкентда ЙПХ ходимлари ва фуқаролар ўртасида жанжал содир бўлгани, Сурхондарёда ҳайдовчи ЙПХ инспекторини уриб, тан жароҳати етказгани тўғрисида хабар берилганди.
Изоҳ (0)