Қашқадарё вилояти Шаҳрисабз шаҳрида ЙПХ ходими ва ҳайдовчи ўртасида жанжал содир бўлди. Вилоят Ички ишлар бошқармаси ахборот хизмати ҳолат юзасидан маълумот берди.
Хабарга кўра, 12 апрель куни соат тахминан 17:40 ларда фуқаро Қ.М. бошқарувида бўлган Lacetti’ни ўзи ва ўзгалар ҳаётини хавф остига қўйиб, спиртли ичимлик истеъмол қилган ҳолда М-39 автомобиль йўлининг Китоб—Шаҳрисабз йўналишида бошқариб келган.
Шу вақт бошқарувни йўқотиб қарама-қарши йўналиш бўйлаб ҳаракатланиб келаётган фуқаро Ж.Ж. бошқарувида бўлган “Ҳамкор” русумли мототцикл билан йўл-транспорт ҳодисаси содир этган.
Ўз хизмат вазифасини бажараётган Шаҳрисабз шаҳар ИИБ ЖХХ ЙҲХБ катта инспектори йўл-транспорт ҳодисасини процессуал расмийлаштириш мақсадида ҳайдовчини тўхтатиб, Қ.М.нинг спиртли ичимликдан мастлик ҳолатини аниқлаш учун алкотестер текширувидан ўтказмоқчи бўлган. Ҳайдовчи инспекторнинг қонуний талабига бўйсунмасдан, фаол қаршилик кўрсатган.
Мазкур ҳолат юзасидан Қ.М.га нисбатан Шаҳрисабз шаҳар прокуратураси томонидан Жиноят кодексининг 219-моддаси билан жиноят иши қўзғатилиб, ҳайдовчи процессуал тартибда ушланиб, қамоқ эҳтиёт чораси қўлланган.
Ҳозирда Шаҳрисабз шаҳар прокуратураси томонидан дастлабки тергов ҳаракатлари олиб борилмоқда.
Изоҳ (0)