ЙПХ ходимлари томонидан тегишли ҳужжатларсиз олиб кетилаётган 360 та iPhone 16 Pro Max телефонлари аниқланди. Бу ҳақда Йўл ҳаракати хавфсизлиги хизмати хабар берди.
Маълум қилиншича, 11 апрель куни соат 05:30 ларда “Наманган” ЙПХ масканида ЙҲХХ Қамчиқ довони бўйича ЙПХ отряди ходимлари томонидан Водий—Тошкент йўналишида ҳаракатланиб келган ҳайдовчи, 1994 йилда туғилган А.М. бошқарувидаги Lacetti тўхтатилиб текширилди.
Текширувда машинанинг салони ва юкхонасида жами 360 та iPhone 16 Pro Max телефон қурилмалари олиб кетилаётгани, ушбу қурилмаларга оид тегишли ҳужжатлар мавжуд эмаслиги аниқланган.
Ҳолат юзасидан ўрнатилган тартибда ҳужжатлар расмийлаштирилиб, қурилмалар ҳамда фуқаро А.М. Наманган вилояти ИЖҚК департаментининг Поп тумани бўлими ходимларига суриштирув ишларини давом эттириш учун топширилган.
2024 йилнинг октябрь ойида Фарғона вилоятида божхона ходимлари 900 миллион сўмлик iPhone 16 Pro Max’ларнинг ноқонуний олиб кирилишига чек қўйилган эди.
Изоҳ (0)