Фарғона вилоятида ички ишлар органлари ходимларининг қонуний талабига бўйсунмасдан, фаол қаршилик кўрсатган фуқароларга нисбатан жиноят ишлари қўзғатилди. Бу ҳақда “Вазият 24” дастурида маълум қилинди.
Қайд этилишича, Қўқон шаҳридаги бозорда жамоат тартибини сақлаётган йўл-патрул хизмати инспекторлари Nexia-2 транспорт воситаси давлат рақами белгиларисиз ҳаракатланаётгани учун тўхтатилган. Ҳайдовчи ходимнинг қонуний талабларига бўйсунмасдан, фаол қаршилик кўрсатиб, уни турли ножўя сўзлар билан ҳақорат қилган ва тан жароҳати етказган.
Ҳолат юзасидан Қўқон шаҳар прокуратураси томонидан ушбу фуқарога нисбатан Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) 2-қисми билан ва 140-модда (ҳақорат қилиш) 3-қисми билан жиноят иши қўзғатилиб, қамоққа олиш тарзидаги эҳтиёт чораси қўлланилган.
Шунингдек, Фарғона тумани “Гулшан” МФЙда Tico русумли автомобиль катта тезликда хавфли ҳаракатлангани учун профилактика инспекторлари машина ортидан кузатиб борган. Автомобиль тўхтаган вақтда маст ҳолатда бўлган ҳайдовчи ва унинг акаси ходимларга ҳужум қилиб, тан жароҳати етказган.
Ҳолат юзасидан Фарғона туман прокуратураси томонидан Жиноят кодексининг 277-моддаси (безорилик) 3-қисми билан жиноят иши қўзғатилган. Уларга нисбатан ҳам қамоққа олиш тарзидаги эҳтиёт чораси қўлланилган.
Риштон тумани ИИБ профилактика инспектори тумандаги хонадонлардан бирига фуқаро маст ҳолатда жанжал кўтараётгани учун чақирилган. Бироқ маст ҳолатдаги фуқаро ходимга қаршилик кўрсатиб, унга тан жароҳати етказган. Ҳолат юзасидан жиноят иши қўзғатилган.
Ҳозирда ҳолатлар юзасидан тергов-суриштирув ҳаракатлари олиб борилмоқда.
ЙПХ ходимларининг калтакланиш ҳолатлари
Май бошида Тошкентда ЙПХ ходимларининг талабини бажармасдан, уларни ҳақорат қилган шахслар 15 суткага қамалгани тўғрисида хабар берилганди. Апрель охирида эса Қашқадарё вилояти Шаҳрисабз шаҳрида ЙПХ ходими ва ҳайдовчи ўртасида жанжал содир бўлган эди. Бир неча кун олдин бўлса Андижон вилоятида ЙПХ ходимига мушт тушириб, унинг хизмат фаолиятига қаршилик кўрсатган қоидабузар ҳайдовчига чора кўрилди.
Изоҳ (0)