Ижтимоий тармоқларда Фарғона вилоятида ЙПХ ходими шорти кийган ҳайдовчига бундай ҳолда автомобиль бошқариш мумкинмаслиги, бунинг учун ҳатто маъмурий баённома расмийлаштирилиши ҳақида огоҳлантиргани тасвирланган видео тарқалди. ИИВ ЙҲХХ ҳолатга муносабат билдириб, шорти кийган ҳайдовчиларга нисбатан ҳеч қандай жазо чоралари мавжуд эмаслигини маълум қилди.
16 апрель куни Учкўприк тумани деҳқон бозори яқинида ЙПХ ходими А.Ўринов меъёрий ҳужжатларини текшириш мақсадида Matiz русумли автомобиль ҳайдовчисини тўхтатган. Ўзаро мулоқот жараёнида ЙПХ ходими ҳайдовчининг кийимига эътироз билдириб, Йўл ҳаракати қоидалари китобининг 55–56-саҳифаларида ҳайдовчи кийим кийиш маданиятига риоя қилиши бўйича банд белгиланганини таъкидлаб, маъмурий баённома расмийлаштириши мумкинлигини ҳам келтириб ўтган. Ушбу мулоқот акс этган видео ижтимоий тармоқларда тарқалиб, кенг жамоатчилик муҳокамаларига сабаб бўлган.
Маълум қилинишича, амалдаги Йўл ҳаракати қоидаларида ҳайдовчи транспорт воситасидан фойдаланиш ва уни бошқариш вақтида кийим кийиш тартиби тўғрисида ҳеч қандай изоҳ ёки тартиб белгиланмаган. Шунингдек, Маъмурий жавобгарлик тўғрисидаги кодексда ҳам юқоридаги ҳолат бўйича ҳеч қандай жазо чоралари мавжуд эмас.
«Ҳайдовчига нотўғри ва асоссиз маълумот етказган ЙПХ ходими А.Ўриновга нисбатан хизмат текшируви тайинланганини маълум қиламиз», — дейилади муносабатда.
Аввалроқ Тошкент вилоятида Matiz ҳайдовчиси ва ЙПХ ходимлари ўртасида жанжал содир бўлганди.
Изоҳ (0)