Нигериянинг Нигер штатида жойлашган Моква савдо шаҳарчасида кучли ёмғирлар ва ундан кейин юз берган сув тошқини оқибатида камида 88 киши ҳалок бўлган. Бу ҳақда Тhе Associated Press нашри хабар бермоқда.
Минна шаҳар Фавқулодда вазиятлар бошқармаси раҳбари Исаҳ Ҳуссеинининг билдиришича, қутқарув ишлари давом этмоқда, бироқ кўплаб фуқаролар ҳали ҳам хавф остида қолмоқда. Дастлабки хабарларда 20 нафар ҳалок бўлган фуқаро ҳақида айтилган бўлса-да, ҳодиса кўлами кенгайгани сари қурбонлар сони ортмоқда.
“Қурбонлар сони ошиб бормоқда. Охирги ҳисоб-китобларга кўра, 88 жасад топилди”, дейди Исаҳ Ҳуссеини.
Маҳаллий нашрларнинг хабар беришича, тошқинларга бир неча соат давом этган кучли ёмғир сабаб бўлган, шунингдек, яқин атрофдаги шаҳарчада жойлашган тўғон қулаш ҳолатини янада оғирлаштирган. Сув тошқини инфратузилмага зарар етказган ва 50 га яқин турар жой биноларини сув босган.
Моква шаҳарчаси Нигериянинг жанубий ҳудудларидан келган савдогарлар ва шимолдаги қишлоқ хўжалиги ишлаб чиқарувчилари учун муҳим савдо нуқтаси ҳисобланади.
Нигерия ҳар йили ёмғир мавсумида, айниқса Нигер ва Бенуэ дарёлари бўйида жойлашган ҳудудларда, сув тошқинларига дуч келади. Мутахассислар бундай ҳодисаларни иқлим ўзгаришлари ва инфратузилма заифлиги билан боғламоқда.
Бундан аввал Ҳиндистоннинг Уттар-Прадеш штатида момақалдироқли жала оқибатида камида 45 киши ҳаётдан кўз юмгани, пойтахт Деҳлида ёғган кучли жала ва йирик дўл оқибатида беш киши ҳалок бўлгани ма`лум қилинганди.
Австралиянинг жануби-шарқида ёғган ёмғир қисқа муддатли тошқинларни келтириб чиқарган, кўплаб шаҳарларни ташқи дунёдан узиб қўйган ва аҳоли уй томларида жон сақлаётгани хабар қилинганди.
Май ойи бошида Конго Демократик Республикасида юз берган сув тошқинлари оқибатида эса 100 дан ортиқ одам ҳалок бўлди.
Изоҳ (0)