Рекорд даражадаги ёғингарчилик туфайли Нигерда камида 273 киши ҳалок бўлди, 700 мингдан ортиқ киши ўз уйини ташлаб кетишга мажбур бўлди. Бу ҳақда Malijet портали маълум қилди.
Узоқ муддат давом этган ёғингарчиликлар туфайли Африкадаги энг иссиқ ва қуруқ шаҳарлардан бири ҳисобланган Агадез шаҳри сув остида қолди.
Мазкур шаҳардаги кўплаб одамлар кучли ёғингарчилик учун мўлжалланмаган, хом ғиштлардан қурилган уйлари намлик таъсирида қулаб тушгани сабабли вафот этди.
Миллий фуқаро мудофааси хизматининг қайд этишича, энг кўп зарар кўрган ҳудудлар Тауа ва Маради бўлган, бу ерларда мос равишда 87 ва 86 киши қурбон бўлган. Умуман олганда, мамлакатдаги 266 та ҳудудда сув тошқини қайд этилган, 73 мингдан ортиқ турар жой бинолари вайрон бўлган.
Метеорологларнинг маълумотларига кўра, сўнгги бир-икки ҳафта давомида Ғарбий ва Марказий Африканинг бир қанча мамлакатларида — Гвинея, Конго демократик республикаси, Кот-д’Ивуар, Либерия, Мали, Нигер, Нигерия, Тогода кучли ёмғир ёғган.
Изоҳ (0)