Африканинг Замбия давлатида вабо эпидемияси пайдо бўлди. Касаллик тез тарқалмоқда, 400 дан ортиқ одам аллақачон вафот этган, деб ёзади ABC News.
Телеканал хабар беришича, Замбияда вабо эпидемияси оқибатида 10 мингдан ортиқ одам касалланган, 412 киши вафот этган. Мамлакат ҳукумати барча мактабларни 29 январгача карантинга ёпди, пойтахт Лусакадаги 60 минг томошабинга мўлжалланган футбол стадиони эса улкан дала касалхонасига айлантирилди.
Замбия ҳукумати кенг кўламли эмлаш кампаниясини ўтказиши ва эпидемияга қарши курашиш учун жабрланган ҳудудларга кунига 2,4 миллион литр тоза сув жўнатишини маълум қилди. Фавқулодда вазиятларни бошқариш миллий агентлиги юқори шай ҳолатга келтирилди.
Замбияда вабо 2023 йил октябрь ойида аниқланганди, аммо уни тезда бартараф этишнинг иложи бўлмади. Касалликнинг авж олиши эпидемияга айланди — 17 январь ҳолатига кўра, Замбия соғлиқни сақлаш институти 10 413 та касалланиш ҳолатни қайд этди. Мамлакат Соғлиқни сақлаш вазирлиги туманларнинг деярли ярмида ва 10 та вилоятдан тўққизтасида вабо аниқланганини маълум қилди ва эпидемияни “миллий муаммо” деб атади.
Касалликни юқтирганлар сони ўсишда давом этмоқда, шифокорлар ҳар куни 400 дан ортиқ янги ҳолатларни аниқламоқда. Жаҳон соғлиқни сақлаш ташкилоти Замбияга вабога қарши 1,4 миллион дозага яқин вакцина юборди.
Замбияда вабодан ўлим даражаси ўртача статистик кўрсаткичдан сезиларли даражада юқори — 4 фоиз. Вазият кучли ёмғир ва сув тошқини оқибатлари билан мураккаблашди, мамлакатнинг айрим ҳудудлари амалда ботқоқларга айланган.
Бунгача Африканинг бошқа мамлакатларида — Малави, Мозамбик, Нигерия, Уганда ва Зимбабведа маҳаллий вабо эпидемияси кузатилган. 2023 йил бошидан буён Африка жанубида 200 мингдан ортиқ одам вабо билан касалланган, 3 мингдан ортиқ киши вафот этган.
Изоҳ (0)