Хитой раиси Си Цзиньпин президент Владимир Путиннинг таклифига биноан 7—10 май кунлари расмий ташриф билан Россияга боради. Бу ҳақда Кремль матбуот хизмати маълум қилди.
Қайд этилишича, у Ғалабанинг 80 йиллигига бағишланган тантанали тадбирларда иштирок этади. Шунингдек, давлат раҳбарлари ўртасида музокаралар ўтказиш ва ҳужжатлар имзолаш режалаштирилган.
Музокараларда кенг қамровли шериклик ва стратегик шериклик муносабатларини янада ривожлантиришнинг асосий масалалари, халқаро ва минтақавий аҳамиятга молик долзарб муаммолар муҳокама қилинади. Бир қатор икки томонлама ҳукуматлараро ва идоралараро ҳужжатлар имзоланиши режалаштирилган, дейилади хабарда.
Си Цзиньпин Москвадаги ғалаба парадида иштирок этишини апрель ойида Путин маълум қилганди. Ўшанда у Хитой раҳбари тўлақонли давлат ташрифи билан келишини айтган.
Хитой раиси бизнинг асосий меҳмонимиз бўлади ва биз икки томонлама муносабатларнинг ҳозирги ҳолати ҳақида суҳбатлашиш, халқаро майдонларда ўзаро ҳамкорлигимизни муҳокама қилиш имкониятига эга бўламиз, деган эди Россия президенти.
Ғалабанинг 80 йиллигига Москвага 20 га яқин давлат раҳбарлари келиши кутилмоқда
9 май куни кўп ташриф буюрадиган МДҲ давлатлари раҳбарлари билан бир қаторда, Бразилия ва Буркина-Фасо президентлари Лула да Сильва ва Иброҳим Траоре, Венесуэла ҳамда Ветнам етакчилари Николас Мадуро ва То Лама, Сербия президенти Александр Вучич ва Словакия бош вазири Роберт Фицо иштирок этиши режалаштирилган.
Москвадаги парадга бир ҳафтадан камроқ вақт қолганда Европанинг кутилаётган етакчилари — Фицо ва Вучичнинг соғлиғида муаммолар юзага келган. Сербия президенти АҚШга ташрифини тўхтатган, у Белграддаги касалхонага ётқизилган. Кейинчалик Вучич Ҳарбий тиббиёт академиясидан чиқарилган.
Фицонинг аҳволи ёмонлашгани ва май ойида унинг учрашувлари бекор қилингани ҳақида Твновинй портали хабар берган. Словакия бош вазирининг Смер парламентидаги фракцияси раҳбари Ян Рихтернинг айтишича, Фицонинг соғлиғи яхши, муаммолар эса сиёсатчига суиқасднинг яқинлашиб келаётган йиллиги (15 май) муносабати билан психологик характерга эга бўлиши мумкин. Фицонинг Москвага ташриф буюриш режаси ўзгармагани айтилмоқда.
Бунгача Европа Иттифоқи расмийлари Москвага ташриф буюришга қарор қилган европалик сиёсатчилар учун жавобгарлик билан таҳдид қилган. Вучич ўз режаларини ўзгартирмаслигини айтганди. Фицо эса сафарлар туфайли огоҳлантиришлар билан чиққан Европа Иттифоқи дипломатияси раҳбари Кая Каллас унга кўрсатма бера олмаслигини таъкидлаган.
Изоҳ (0)