Қозоғистон ва Ўзбекистон биргаликда болалар саратони бўйича академик марказ ташкил қилади. Бу ҳақда “Дунё” ахборот агентлиги хабар берди.
Унга кўра, Тошкентда бўлиб ўтган “Болалар учун мулоқот: Марказий Осиё ва ЮНИСЕФ” юқори даражадаги конференцияси доирасида Қозоғистон соғлиқни сақлаш вазири Акмарал Алназарова ва Ўзбекистон соғлиқни сақлаш вазирлари Асилбек Худоёров ўртасида музокаралар бўлиб ўтди.
Томонлар соғлиқни сақлаш соҳасидаги ҳамкорликнинг устувор йўналишлари, жумладан, тиббий хизматлар сифатини ошириш, тиббий ёрдам кўрсатишда тажриба алмашиш, бирламчи тиббий-санитария ёрдами бўйича мамлакатлар коалицияси доирасида ўзаро ҳамкорлик, шунингдек, Оролбўйи аҳолиси саломатлигига таъсир этувчи экологик омилларни комплекс ўрганишга қаратилган қўшма илмий лойиҳаларни муҳокама қилди.
Мулоқот чоғида болалар саломатлигини муҳофаза қилиш масалаларига алоҳида эътибор қаратилди. Қозоғистон болалар саратони бўйича Халқаро академик марказ яратишни таклиф қилиб, уни амалга оширишда фаол иштирок этишга тайёрлигини билдирди.
Шунингдек, Миллий илмий онкология маркази негизида Катталар онкологияси ва онкогематологияси бўйича халқаро хаб, УМC юрак маркази негизида болалар кардиожарроҳлиги халқаро хабини ташкил этиш, жумладан, қорақалпоғистонлик болаларга ёрдам кўрсатиш имкониятларини ҳам таклиф этилди.
Учрашув якунлари бўйича жорий йилда Ўзбекистонда қозоқ тиббиёти кунлари ва 2026 йилда Қозоғистонда ўзбек тиббиёти кунларини ўтказиш бўйича келишувга эришилди. Томонлар, шунингдек, соғлиқни сақлаш соҳасида Халқаро хаб ташкил этиш таклифини қўллаб-қувватлади.
Бундан аввал Ўзбекистон ва Қозоғистон тўртта чегара постида янги юк автомобиллари ҳаракатини йўлга қўймоқчилиги ҳақида хабар берилганди. Томонлар божхона лабораториялари ўртасида ва кадрлар малакасини ошириш бўйича ҳамкорликни назарда тутувчи келишувларни кўриб чиқди. Учрашув якунида иккала давлат божхона хизматлари ўртасидаги ўзаро ҳамкорликка янгича руҳ берувчи 3 та ҳужжат имзоланганди.
Изоҳ (0)