Марказий Осиё давлатлари ва Хитой транспорт вазирлари халқаро автомобиль ташувларини соддалаштириш ва хорижий рухсатнома бланкларини (ХРБ) айирбошлаш тизимини электрон шаклга ўтказиш бўйича келишувга эришдилар. Бу ҳақда Қозоғистон Транспорт вазирлиги матбуот хизмати хабар бермоқда.
Маълум қилинишича, 16 май куни Остонада бўлиб ўтган транспорт идоралари раҳбарларининг иккинчи учрашуви ўтказилган. Унда вазирлар минтақа ва жаҳон транспорт соҳасидаги мавжуд вазиятни, шунингдек, Хитой ва Марказий Осиё мамлакатлари ўртасидаги иқтисодий, савдо ва гуманитар ҳамкорликка оид кенг қамровли масалаларни муҳокама қилишган.
“Олти томонлама учрашув доирасида транспорт идоралари раҳбарлари Марказий Осиё мамлакатлари ва Хитой ўртасида транспорт соҳасида кўп томонлама ҳамкорлик дастурини ишлаб чиқиш муҳимлигини таъкидладилар. Ушбу дастур электрон ҳужжат айланишини ва юклар ҳаракатини онлайн кузатиш имкониятини таъминлайди. Вазирлар халқаро автомобиль ташувларини соддалаштириш ва ХРБ алмашинув жараёнини рақамли шаклга ўтказиш ниятини тасдиқлади. ХРБ ташувчиларга халқаро юк ташишни амалга ошириш имконини берувчи ҳужжатдир”, дейилади хабарда.
Ҳозирги кунда Қозоғистон Хитой ва Ўзбекистон билан ХРБ электрон алмашинувини амалга оширмоқда. Яқин келажакда рақамлаштириш Қирғизистон, Туркманистон ва Тожикистон билан алмашинувни ҳам қамраб олади, бу эса халқаро ташиш жараёнларини сезиларли даражада тезлаштиради.
Учрашув якунида вазирлар транспорт идоралари ўртасидаги ҳамкорлик, шунингдек, халқаро автомобиль ташувларини рақамлаштириш соҳасида ўзаро англашув меморандумларини имзолашган.
Бундан ташқари, томонлар автомобиль ва темир йўл ташувларини амалга оширишда Марказий Осиё давлатлари ва Хитой ўртасидаги чегара пунктларини кесиб ўтиш тартиб-қоидаларини соддалаштириш зарурлиги тўғрисида умумий фикрга келишган.
Изоҳ (0)