Оқ уй аппарати раҳбари Сюзан Уайлснинг телефонига хакерлар бузиб кириб, унинг номидан америкалик сенаторлар, губернаторлар ва йирик бизнесменларга ёлғон хабарлар юборди ҳамда телефон қўнғироқларини амалга оширди. Бу ҳақда манбаларга таяниб The Wall Street Journal хабар берди.
Сюзан Уайлс АҚШ президенти Дональд Трампнинг энг яқин маслаҳатчиларидан бири бўлиб, илгари унинг сайловолди кампаниясини бошқарган. Хакерлик ҳужуми натижасида мамлакатдаги энг нуфузли шахсларнинг контактларига кириш имкони бўлган.
Ҳужум оқибатида айрим қонунчилар Уайлс номидан пул ўтказмасини амалга ошириш ёки Трамп афв этиши мумкин бўлган шахслар рўйхатини тузиш бўйича сўровлар олган. Телефон қўнғироқлари чоғида хакерлар сунъий интеллект ёрдамида Уайлснинг овозини тақлид қилган бўлиши мумкин.
Уайлс номидан ёзилган хатлар олувчиларда шубҳа уйғотган, чунки уларда грамматик хатолар бўлган ва ёзиш услуби кескин фарқланган. Шунингдек, ўзини Уайлс деб таништирган шахс Трамп ҳақида саволлар берган. Оқ уй аппарати раҳбари бу саволларнинг жавобини биларди.
Фирибгарлик ортида ким тургани ва унинг мақсади номаълум. Ҳозирда Федерал қидирув бюроси ва Оқ уй ушбу ҳолат юзасидан тергов олиб бормоқда. Терговчилар фикрича, ҳозирча ҳужум ортида хорижий давлат турганига оид аниқ далиллар мавжуд эмас.
Изоҳ (0)